Baki-baku.az-ın məlumatına görə, Şimali Karolina Universitetinin tibb məktəbinin alimləri belə qənaətə gəliblər. Tədqiqatın nəticələri “Neuron” jurnalında dərc olunub.

Mütəxəssislər müəyyən ediblər ki, yağlı qidalar yaddaşa cavabdeh olan beynin hipokamp hissəsində yerləşən xüsusi hüceyrələrin aktivliyini kəskin şəkildə dəyişir. Bu hüceyrələr CCK interneyronları adlanır və qlükozanın mənimsənilməsindəki pozuntular səbəbindən həddindən artıq aktivləşirlər. Nəticədə belə qidalanmanın cəmi dördüncü günündə heyvanlarda yaddaş pozuntuları müşahidə olunub.

Alimlərin sözlərinə görə, bu tip qidalanma klassik “qərb rasionu”nu – hamburger, kartof fri və yüksək doymuş yağ tərkibli digər məhsulları xatırladır. Diqqətçəkən məqam isə ondan ibarətdir ki, yaddaşdakı bu pozuntular artıq çəki və ya diabet əlamətləri yaranmamışdan əvvəl baş verib.

Tədqiqatçılar həmçinin sübut ediblər ki, bu proses geridönəndir. Beyində qlükoza səviyyəsinin bərpası və ya interval orucu (intermittent fasting) neyronların fəaliyyətini normallaşdırır və yaddaşı yaxşılaşdırır. Onların fikrincə, bu metodlar piylənmə və maddələr mübadiləsi pozuntuları ilə bağlı idrak problemlərinin qarşısının alınmasında əsas rol oynaya bilər.