Son günlər Bakıda keçirilən Ümumdünya Şəhərsalma Forumunun 13-cü sessiyası (WUF13) paytaxtımıza dünyanın müxtəlif ölkələrindən minlərlə qonağı gətirib. Forum çərçivəsində şəhərə gələn xarici nümayəndələr, merlər, ekspertlər və turistlər Bakıyla bağlı bir məqamı xüsusilə vurğulayırlar: şəhərin təmizliyi və səliqəsi.
Bu gün Bakının küçələrində gəzən qonaqlar ilk növbədə şəhərdəki nizam-intizamı, parkların baxımlılığını, yaşıllıq zolaqlarını və ictimai məkanlardakı təmizliyi diqqətə çatdırırlar. Şəhər mühitində hiss olunan rahatlıq və sistemlilik artıq Bakının formalaşan yeni simasına çevrilməkdədir.
Halbuki bir neçə il əvvəl paytaxtımıza gələn turistlər daha çox Azərbaycan mətbəxindən danışırdılar. Dolma, plov, qutab və digər milli yeməklər Bakının əsas tanıdıcı xüsusiyyətləri sırasında idi. Şəhərdə keçirilən müxtəlif sorğularda xarici qonaqlar Bakının zəngin və ləzzətli mətbəxini xüsusi qeyd edirdilər. Bu gün isə həmin təəssüratlara şəhərin təmizliyi, təhlükəsizliyi və müasir urbanistik görünüşü də əlavə olunub.
Əslində, təmizlik sadəcə vizual gözəllik deyil. Bu, şəhərin mədəniyyətinin, idarəetmə səviyyəsinin və sakinlərin ictimai məsuliyyət hissinin göstəricisidir. Bakı küçələrində atılan hər addımda şəhərə göstərilən diqqəti və qayğını hiss etmək mümkündür.
Son illərdə paytaxtda həyata keçirilən abadlıq işləri şəhərin simasını əhəmiyyətli dərəcədə dəyişib. Parkların yenilənməsi, yeni yaşıllıq zonalarının salınması, küçə və prospektlərin mütəmadi təmizlənməsi, məhəllədaxili ərazilərin abadlaşdırılması Bakını daha komfortlu və estetik şəhərə çevirib.
Bu dəyişikliklər beynəlxalq qonaqların diqqətindən də yayınmır. Xarici nümayəndələr və turistlər sosial şəbəkələrdə paylaşdıqları görüntülərdə, həmçinin mediaya verdikləri açıqlamalarda Bakının təmizliyini, təhlükəsizliyini və şəhər nizamını xüsusi vurğulayırlar. Bu isə həm turizm potensialının artması, həm də şəhərin beynəlxalq nüfuzunun güclənməsi baxımından mühüm əhəmiyyət daşıyır.
WUF13 çərçivəsində Bakı Şəhər İcra Hakimiyyətində keçirilən görüşlərdə müxtəlif şəhərlərin merləri də paytaxtla bağlı müsbət fikirlərini bölüşüblər.
Yan van Zanen Bakıda güclü yağışlardan sonra həyata keçirilən operativ tədbirlərə diqqət çəkərək bildirib ki, şəhər qısa müddətdə normal həyat ritminə qayıda bilib.
“8 saat aramsız yağan yağışdan sonra şəhər vəziyyətə sürətlə uyğunlaşdı. Növbəti gün Bakı artıq quru, təmiz və normal fəaliyyətinə davam edən şəhər idi”, — deyə o vurğulayıb.
Mixail Kılvart isə Bakının son illərdə keçdiyi inkişaf yolunu yüksək qiymətləndirib:
“Siz şəhərinizi tamamilə yeni səviyyəyə çatdırmısınız. Burada keçirilən beynəlxalq tədbirlər və forumlar inkişaf tempini daha da artırır. Biz hətta sizə qibtə edirik.”
Adaneç Abebe də Bakının xüsusilə təhlükəsiz və rahat şəhər olması ilə bağlı müsbət təəssüratlarını bölüşüb. O qeyd edib ki, şəhərdə gecə saatlarında belə rahat və təhlükəsiz mühit hiss olunur.
Bakı Şəhər İcra Hakimiyyətinin başçısı Eldar Əzizov isə bu nəticələrin Prezident İlham Əliyev tərəfindən həyata keçirilən şəhərsalma və inkişaf siyasətinin uğurlu nəticəsi olduğunu bildirib.
Bu gün Bakı artıq yalnız qədim tarixi, zəngin memarlığı və milli mətbəxi ilə deyil, həm də müasir şəhər mədəniyyəti, təmizliyi və rahat urbanistik mühiti ilə seçilən paytaxtlardan birinə çevrilir.
Ancaq şəhərin bu simasının qorunması təkcə aidiyyəti qurumların işi deyil. Təmiz və nümunəvi Bakının qorunması hər bir vətəndaşın məsuliyyətidir. Çünki Bakı hamımızın evidir və onun gözəlliyini qorumaq hər kəsin ortaq borcudur.
