Müasir istirahət mərkəzləri içərisində inşasına 2013-cü ildən başlanılan Bayıl bulvarının özünəməxsus yeri var. 2015-ci il iyunun 8-də açılışı olan bu istirahət məkanının ümumi sahəsi 24 hektardır. Uzunluğu 2,3 kilometr olan Bayıl bulvarında 16 hektar yaşıllıq zonası salınıb, müasir işıqlandırma və suvarma sistemləri quraşdırılıb, müxtəlif istirahət, iaşə və yeni mədəniyyət obyektləri inşa edilib. Sakinlərin rahatlığı üçün ərazidə velosipedçilər üçün xüsusi yer ayrılıb. İstirahət mərkəzində yaradılan infrastrukturun ən müasir tələblər səviyyəsində olması sakinlərin rahatlığına xidmət edir. Bayıl bulvarından Xəzərə açılan mənzərə həm sakinlərin, həm də turistlərin zövqünü oxşayır.