Bir neçə il əvvəl dövlətimizin başçısının tapşırığı ilə “Bakı Abadlıq Xidməti” və Bakı Şəhər İcra Hakimiyyəti birlikdə şəhərin tarixi mərkəzində genişmiqyaslı abadlıq işləri həyata keçirdi. Bu çərçivədə binaların fasadları, həyətləri, küçələr, o cümlədən Əlövsət Quliyev küçəsi də əsaslı şəkildə təmir olundu, səliqəli bordür daşları ilə abadlaşdırıldı.
Baki-baku.az xəbər verir ki, lakin son günlərdə həmin küçədə baş verənlər yenidən narazılığa səbəb olub. Belə ki, sakinlər sosial şəbəkələrdə bu barədə paylaşımlar edir. Onlar Azərbaycan Dövlət Su Ehtiyatları Agentliyinin əməkdaşlarının sözügedən ərazidə qazıntı işləri apararaq yolu yararsız vəziyyətə saldığını, ardınca isə Azərbaycan Avtomobil Yolları Dövlət Agentliyinin işçiləri həmin yolun asfaltlanması zamanı bordür daşlarını yerlərindən çıxarıb ətrafa səpələdiyini bildirirlər.
Sakinlər məsul qurumları bu cür halların təkrarlanmaması üçün koordinasiyalı və düşünülmüş fəaliyyətə çağırır.