Azərbaycan memarlığının görkəmli nümayəndələrindən biri olan Sadıq Ələkbər oğlu Dadaşov cəmi 41 illik ömrünə baxmayaraq, ölkənin memarlıq salnaməsində dərin iz buraxıb.
Baki-baku.az xəbər verir ki, onun layihələri bu gün də Bakının simasını formalaşdıran əsas memarlıq nümunələri sırasında qalmaqdadır.
Dadaşovun müəllifi olduğu tikililər arasında Azərbaycan Dövlət Neft və Sənaye Universitetinin (1932), Azərbaycan Texniki Universitetinin (1935) binaları, “Nizami” kinoteatrı (1934), Bakı Musiqi Akademiyası (1936), Nizami Gəncəvi adına Milli Azərbaycan Ədəbiyyatı Muzeyi (1940), eləcə də Nazirlər Kabinetinin inzibati binası (1938–1941) xüsusi yer tutur. O həmçinin 1939-cu ildə Moskvada Azərbaycan pavilyonunun layihələndirilməsində də iştirak edib.
Memar heykəltəraşlıq layihələri ilə də tanınır. Onun müəllifi olduğu Nizami Gəncəvinin Gəncədə (1946) və Bakıda (1949) qoyulmuş abidələri milli mədəni irsin dəyərli nümunələri sayılır.
Sadıq Dadaşov bir çox layihələrdə görkəmli memar Mikayıl Hüseynov ilə birlikdə çalışıb. Onların ortaq yaradıcılığı milli memarlıq üslubunun qorunub saxlanması və inkişafında mühüm rol oynayıb.
Memarın adı bu gün də yaşadılır. Onun adını daşıyan Elmi-Tədqiqat və Layihə-Konstruktor İnşaat Materialları İnstitutu fəaliyyət göstərir. Bundan əlavə, 8 oktyabr 2022-ci il tarixli Prezident Sərəncamı ilə Bakıda Mikayıl Hüseynov və Sadıq Dadaşovun birgə abidəsinin ucaldılması qərara alınıb.
Qısa, lakin məhsuldar ömür yaşayan Sadıq Dadaşovun əsərləri milli memarlıq ənənələrini müasir dünya memarlıq təcrübəsi ilə birləşdirərək, Azərbaycan memarlığının inkişafına əvəzsiz töhfələr verib.
