Fevralın 16-da İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyi (KOBİA), İxracın və İnvestisiyaların Təşviqi Agentliyinin (AZPROMO) dəstəyi ilə Bakıda yerli istehsalçıların yarmarkası keçiriləcək.
Baki-baku.az AZPROMO-ya istinadən xəbər verir ki, tədbir Bakı sakinlərinə və şəhərin qonaqlarına yerli ustaların istedadını və kreativliyini tanıtmaq üçün vahid platforma təqdim edəcək.
Yarmarka unikal yerli geyim və aksesuarların, eləcə də parfümeriya, şərab və şokolad kimi qida məhsullarının nümayişi üçün geniş imkan yaradacaq. Ziyarətçilər məhsullar almaqla yanaşı, dizaynerlərlə ünsiyyət qurmaq, onların ilham mənbələri və hər bir əşyanın yaradılma hekayəsi haqqında məlumat əldə etmək imkanı qazanacaqlar.
Yarmarkada həmçinin davamlı inkişaf və yerli istehsalçıların dəstəklənməsi mövzusunda ustad dərsləri, mühazirələr və müzakirələr təşkil olunacaq.
