Bakıda Latviyanın Müstəqillik Gününün 107-ci ildönümü qeyd olunub.

Baki-baku.az xəbər verir ki, mərasimində səfirlər, deputatlar, ictimai-siyasi xadimlər və digər qonaqlar iştirak ediblər. Mərasim Azərbaycan və Latviyanın Dövlət himnlərinin səsləndirilməsi ilə başlayıb.

Sonra Latviyanın ölkəmizdəki səfiri Edqars Skuya çıxış edib və iki ölkə arasında əlaqələrin inkişaf perspektivləri barədə danışıb.

O, həm də ölkəsinin Azərbaycan-Ermənistan sülh prosesinə töhfə verməyə hazır olduğunu bildirib.

Azərbaycanın kənd təsərrüfatı naziri Məcnun Məmmədov çıxışında ölkələrimiz arasında əlaqələrin dərinləşdirilməsi ətrafında görülən işlər barədə məlumat verib.

“Azərbaycan və Latviya arasında otuz ildən artıq müddətdə formalaşmış münasibətlər qarşılıqlı hörmət və tərəfdaşlığa əsaslanır.

Azərbaycan ölkələrimiz arasında əlaqələrin möhkəmləndirilməsinə böyük önəm verir və əməkdaşlığımızın daha da genişləndirilməsi üçün böyük potensialın olduğuna inanır.

Hüquqi çərçivəmizin bir hissəsi olaraq, bu günə qədər ölkələrimiz arasında 47 sənəd imzalanıb. Hazırda altı sənəd layihəsi nəzərdən keçirilir. Yaxın gələcəkdə bu sənədlərin imzalanması ölkələrimiz arasında əməkdaşlığın daha da inkişafı üçün yeni imkanlar açacaq”, Məcnun Məmmədov qeyd edib.