Bakıda keçirilən “Formula 1” üzrə Azərbaycan Qran-prisi artıq bir idman tədbiri olmaqdan çox, ölkənin beynəlxalq imicinə və iqtisadiyyatına ciddi töhfə verən mühüm layihəyə çevrilib.

Baki-baku.az-ın məlumatına görə, bu il yarış günlərində paytaxta 13 mindən çox turistin gəlməsi Azərbaycana həm iqtisadi, həm də mədəni baxımdan əlavə dəyər qazandırıb.

Maraqlıdır ki, yarışı izləmək üçün gələn turistlərin əksəriyyəti Avropa və Asiya ölkələrindən idi. Qonaqlar yalnız 19–21 tarixlərində deyil, ondan bir neçə gün əvvəl və sonra da ölkədə qalıblar. Bu isə onların yalnız Bakının deyil, həm də Azərbaycanın müxtəlif regionlarının turizm potensialını kəşf etməsinə imkan yaradıb. Qəbələ, Şəki, Naftalan, Quba və digər bölgələrdə qonaqların sayı nəzərəçarpacaq dərəcədə artıb.

Ölkəyə gələn hər bir turistin orta hesabla 1000–1500 dollar xərclədiyi güman edilir. Bu xərclərə otel, restoran, nəqliyyat, alış-veriş və əyləncə xidmətləri daxildir. Yalnız bu yarış günlərində ölkə iqtisadiyyatına on milyonlarla dollar əlavə gəlirin daxil olduğu ehtimal edilir. Həmçinin, xarici turistlərin sosial şəbəkələrdə paylaşımları Azərbaycanın beynəlxalq imicinin güclənməsinə xidmət edir.

“Formula 1” üzrə Azərbaycan Qran-prisi ölkənin idman turizmi potensialını ortaya qoymaqla yanaşı, ölkənin qlobal miqyasda tanıdılmasına mühüm təsir göstərir. Bu kimi tədbirlər ölkəyə birbaşa iqtisadi fayda ilə yanaşı, uzunmüddətli perspektivdə turizm sektorunun inkişafına da təkan verir. Deməli, hər bir belə mötəbər idman yarışı Azərbaycanın “yumşaq güc” alətlərindən birinə çevrilərək həm iqtisadi, həm də sosial baxımdan fayda gətirir.