2024-cü ilin yanvar-oktyabr aylarında Bakıda istehsalın ümumi həcmində sənaye məhsulunun payı 93 %, sənaye xarakterli xidmətlərin göstərilməsi isə 7 % təşkil edib.
Baki-baku.az Bakı Şəhər Statistika İdarəsinə istinadla xəbər verir ki, qeyd edilən dövrdə sənayedə istehsal olunmuş malların və göstərilmiş xidmətlərin həcmi 44,4 milyard manat təşkil olub. Sənaye məhsulunun 75,5 %-i mədənçıxarma, 21,4 %-i emal, 2,2 %-i elektrik enerjisi, qaz və buxar istehsalı, bölüşdürülməsi və təchizatı, 0,9 %-i isə su təchizatı, tullantıların təmizlənməsi və emalı sektorlarında istehsal edilb.
Sənayedə qeyri-dövlət sektorunun payı 82,7 % olub.
İstehsal edilmiş məhsulun böyük hissəsi istehlakçılara göndərilmiş, əvvəlki dövrlərdə yaranmış ehtiyatlar da nəzərə alınmaqla sənaye müəssisələrinin anbarlarında 2024-cü il noyabrın 1-i vəziyyətinə 216,2 milyon manatlıq hazır məhsul ehtiyatı yaranıb.
Sənaye müəssisələrinin anbarlarında başqa müəssisələrdən alınmış və satış üçün nəzərdə tutulmuş 192,4 milyon manat məbləğində digər məhsullar da mövcud olub.
