Bakı Zooloji Parkına Türkiyənin Eskişehir və Qazaxıstanın Almatı zooparklarından gətirilən üzük quyruqlu lemurların ilk dəfə balası dünyaya gəlib.
Baki-baku.az xəbər verir ki, ana lemur balanın yanından ayrılmır, təhlükədən qorumaq üçün bel və qarın nahiyəsində daşıyır. Aktiv və sağlam olan bala qrupun digər üzvləri ilə qarşılıqlı əlaqədə olaraq, həm sosial davranışları öyrənir, həm də ətraf mühitə uyğunlaşır.
Balanın böyümə və inkişaf dövrü 6 ay və ya bir il çəkə bilər.
Lemurlar Madaqaskar adasında 15-20 fərddən ibarət, matriarxat qrup şəklində yaşayan sosial primatlardır. Ən diqqət çəkən xüsusiyyətlərdən biri dırmaşma və tullanma zamanı tarazlığı qorumağa kömək edən, siqnallar vermək və qoxu yaymaq üçün istifadə olunan qara-ağ zolaqlı uzun quyruqlarının olmasıdır. Lemurlar növündən asılı olaraq, gündüz və ya gecə həyat tərzi keçirir, günəş altında dincəlməyi xoşlayırlar.
Üzük quyruqlu lemurlar IUCN tərəfindən “nəsli kəsilmə təhlükəsi altında olan” növlər kimi qiymətləndirildiyi üçün saylarının artırılması və mühafizəsi böyük əhəmiyyət kəsb edir.
