Yay mövsümü Bakı üçün turizm baxımından ən aktiv dövrlərdən biri hesab olunur. İsti hava, dəniz mövsümü, beynəlxalq tədbirlər, şəhərdə keçirilən müxtəlif mədəni və əyləncə proqramları paytaxta həm xarici, həm də yerli turistlərin marağını artırır.
Baki-baku.az xəbər verir ki, bununla yanaşı, yay aylarında hotellərin doluluğu və ölkəyə gələn əcnəbilərin sayı turizm sektorunun real vəziyyətini qiymətləndirmək üçün əsas göstəricilər sırasında yer alır.
2026-cı ilin yay mövsümünün nəticələri ilə bağlı ilkin rəqəmlər isə Bakının turizm bazarında həm müsbət, həm də diqqət tələb edən məqamların olduğunu göstərir. Paytaxt ölkəyə gələn xarici qonaqların əsas istiqaməti olaraq qalır. Lakin hotel sektorunda mövcud imkanlardan istifadə səviyyəsi və ölkəyə gələn əcnəbilərin ümumi sayındakı dəyişikliklər yay mövsümünün əvvəlki illərlə müqayisədə daha mürəkkəb mənzərə yaratdığını göstərir.
“Azərbaycan Hotellər və Restoranlar Assosiasiyası”nın İdarə Heyətinin sədri və “Ekoturizm Assosiasiyası”nın icraçı direktoru Samir Dübəndi açıqlamasında bildirib ki, yay mövsümünün yekun qiymətləndirilməsi üçün avqust ayının göstəriciləri də xüsusi əhəmiyyət daşıyır. Çünki iyul ayının sonuna qədər olan rəqəmlər bütün yay mövsümünün nəticələrini tam əks etdirmir. Xüsusilə avqust ayında hotel doluluğunun hansı səviyyədə olması və xarici turist axınının necə dəyişməsi paytaxtın turizm performansına dair daha dəqiq mənzərə yarada bilər.
O bildirib ki, 2026-cı ilin ilk yarısında ölkə üzrə hotellərdə gecələmələr 8,3 % azalıb. Bakı bütün gecələmələrin 58,8 %-ni, xarici qonaqların gecələmələrinin isə 81,9 %-ni qəbul etsə də, paytaxt hotellərində tutumdan istifadə səviyyəsi 29,4 % olub. Yanvar–iyul aylarında ölkəyə gələn əcnəbilərin sayı da 9,2 % azalıb. Bu göstərici sırf turistlərin və ya yalnız Bakıya gələnlərin sayı deyil, lakin ümumi tələb dinamikasını göstərir. İlkin nəticə budur ki, Bakı əsas turizm mərkəzi mövqeyini qoruyur, amma mövcud hotel tutumundan daha səmərəli istifadə üçün böyük ehtiyat qalır.
Beləliklə, yay mövsümünün Bakı üçün əsas suallarından biri turist sayından daha çox, mövcud turizm infrastrukturunun nə dərəcədə effektiv istifadə olunmasıdır. Paytaxtın ölkə üzrə gecələmələrdə və xarici qonaqların hotel gecələmələrində böyük paya sahib olması Bakının turizm xəritəsində dominant mövqeyini qoruduğunu göstərir.
Digər tərəfdən, hotel tutumundan istifadə səviyyəsinin 29,4 % olması bazarda əlavə potensialın mövcudluğuna işarə edir. Bu isə qarşıdakı dövrdə turist axınının artırılması ilə yanaşı, turistlərin Bakıda daha uzun müddət qalmasına, müxtəlif mövsümlərə səfərlərin yayılmasına və şəhərin tədbir turizmi imkanlarından daha geniş istifadə edilməsinə ehtiyac olduğunu gündəmə gətirir.
Bakı üçün xüsusilə payız ayları bu baxımdan yeni imkanlar yarada bilər. Yay mövsümünün başa çatması turist axınının dayanması demək deyil. Əksinə, şəhərdə keçirilən beynəlxalq tədbirlər, konfranslar, mədəni proqramlar və digər turizm məhsulları paytaxtın yaydan sonrakı dövrdə də xarici ziyarətçilər üçün cəlbediciliyini qorumasına imkan verə bilər.
Elvin Camalov
