Venesiya – “Bakı Venesiyası”… Kanalları olan, yaşıllıqlar içində kiçik bir istirahət parkı…

Quru və isti Xəzər sahilində əsl bir şərq fantaziyası – “Bakı Venesiyası” salınıb. Burada qayıqlar miniatür körpülərin altından süzülür, havada isə dəniz qoxusu və şəhər əfsanəsi dolaşır.

Baki-baku.az saytının yazdığına görə, “Kiçik Venesiya” şəhərciyi Bakının Dənizkənarı Milli Parkının ən gözəl guşələrindən biridir. İtaliyanın Venesiyasını xatırladan bu şəhərcik öz gözəlliyi ilə Azərbaycanın paytaxtına xüsusi bir yaraşıq verir.

“Kiçik Venesiya”nın yaranma tarixi o vaxta gedib çıxır ki, Bakı Xalq Deputatları Sovetinin İcraiyyə Komitəsinin sədri (müasir dillə desək, şəhər meri) Alış Ləmbəranski 1950-ci illərin ortalarında əsl Venesiyada olmuşdu və Venesiya nağılını Bakıda reallaşdırmaq qərarına gəlmişdi.

Layihə uzun müddət müzakirə olundu, lakin 1960-cı ildə böyük Dənizkənarı bulvar ərazisində yerləşən kiçik istirahət parkı istifadəyə verildi. Şəhər sakinləri onu dərhal “Kiçik” və ya “Bakı Venesiyası” adlandırdılar.

“Kiçik Venesiya”ya 2012-ci ildə əsaslı yenidənqurmadan sonra yeni nəfəs gəldi.

Yenilənmə işləri zamanı şəhərciyin ümumi quruluşu qorunaraq, onun kanalları genişləndirildi, yeni qayıqlar gətirildi, əlavə körpülər və iki restoran tikildi. Restoranlardan biri Avropa, digəri isə Şərq mətbəxi təklif edir. Burada həm də bir fincan çay içərək xoş vaxt keçirmək mümkündür.

Hacı Cavadov