Bu gün Bərdənin Qarayusifli kəndinin Ermənistan silahlı qüvvələri tərəfindən raket atəşinə tutulmasından beş il keçir.

Baki-baku.az xatırladır ki, 2020-ci il 27 oktyabr tarixində Ermənistan ordusu beynəlxalq hüquqla qadağan olunmuş kasetli bombalardan istifadə etməklə Qarayusifli kəndini hədəfə almışdı. Nəticədə aralarında uşaq və qadınlar da olmaqla 5 dinc sakin həlak olmuş, 14 nəfər mülki şəxs yaralanmışdı.

Həmin hücum 44 günlük Vətən müharibəsi dövründə mülki əhaliyə qarşı törədilən ən qanlı terror aktlarından biri kimi yadda qalıb. Qarayusifli hadisəsi beynəlxalq ictimaiyyət tərəfindən də mülki əhaliyə qarşı kobud hərbi cinayət kimi qiymətləndirilib.

Xatırladaq ki, 2020-ci ilin oktyabr və noyabr aylarında Ermənistan silahlı qüvvələri Bərdə şəhərini dəfələrlə raket və ağır artilleriya atəşinə tutub. 5, 8, 27, 28 oktyabr və 7 noyabr tarixlərində baş verən hücumlar nəticəsində 8-i qadın, 2-si uşaq olmaqla ümumilikdə 29 nəfər həlak olub, 112 nəfər müxtəlif dərəcəli bədən xəsarətləri alıb.

Hücumlar nəticəsində şəhərdə yerləşən mülki infrastruktur obyektlərinə, yaşayış evlərinə və nəqliyyat vasitələrinə ciddi ziyan dəyib.

Azərbaycan Ordusu isə 44 günlük müharibə ərzində dinc əhalinin qisasını döyüş meydanında alaraq ölkəmizin ərazi bütövlüyünü bərpa edib.