ABŞ-ın Kentuki Universitetinin alimləri sübut ediblər ki, çayı Ay torpağını imitasiya edən mühitdə yetişdirmək olar.
Baki-baku.az xəbər verir ki, təcrübə Böyük Britaniyanın “Dartmoor Tea” plantasiyası, “Lightcurve Films” studiyası və “Europlanet” təşkilatı ilə birgə aparılıb. Alimlər bu kəşf haqqında “Space Agriculture Workshop” (SAW) konfransında məlumat veriblər.
Bitkilər “ay” və “Mars” torpaq analoqlarında əkilib, nəticələr isə Devon bölgəsindən gətirilmiş adi torpaqda böyüyən nəzarət qrupu ilə müqayisə olunub. Temperatur, işıqlandırma və rütubət şərtləri kosmosdakı şəraitə uyğun seçilib.
Nəticə gözlənilməz olub. “Ay” torpağında çay kolları kök atıb və nəzarət qrupundakı kimi normal inkişaf edib, amma “Mars” torpağında bitkilər məhv olub.
Alimlər vurğulayırlar ki, araşdırmalar təkcə gələcək Ay bazaları üçün deyil, Yer üçün də əhəmiyyətlidir. Nəticələr bitkilərin əlverişsiz şəraitdə necə sağ qaldığını, iqlim dəyişikliyi və torpaqların münbitsizliyindən əziyyət çəkən zəifləmiş kökləri necə canlandırıla biləcəyini daha yaxşı anlamağa kömək edəcək.
