Çin alimlərinin apardığı son tədqiqat Ayın səthində pas əmələ gəlməsinin sirrini açıb. Məlum olub ki, bu prosesin əsas səbəbi Yerdən kosmosa yayılan və “Yer küləyi” adlandırılan ion axınıdır.

Bakı-baku.az xəbər verir ki, Makao Elm və Texnologiya Universitetinin araşdırması nüfuzlu Geophysical Research Letters jurnalında dərc olunub.

Alimlər müəyyən ediblər ki, Yerdən Aya daşınan oksigen hissəcikləri Ayın mineralları ilə reaksiyaya girərək hematit – yəni pas əmələ gətirir. Bu proses xüsusilə bədirlənmiş Ay zamanı güclənir. Həmin vaxt Yer Günəşlə Ay arasında yerləşərək Günəşdən gələn yüklü hissəciklərin böyük hissəsini bloklayır. Nəticədə Ay Yer atmosferindən kosmosa çıxan ionların təsiri altına düşür.

“Yer küləyi”ndə hidrogen, oksigen və azot ionları mövcuddur. Onlar Ay torpağının səth qatına daxil olaraq kimyəvi reaksiyalar yaradır.

Xatırladaq ki, 2020-ci ildə Hindistanın “Chandrayaan-1” missiyası Ayın qütbləri yaxınlığında hematit aşkar etmişdi. Bu kəşf alimlərdə sual doğurmuşdu, çünki Ayın mühiti oksigenin mövcudluğuna imkan vermir. Son eksperimentlər isə bu sirri aydınlaşdırıb: Ay mineralları yüksək enerjili oksigenlə reaksiyaya girərək paslanır, hidrogenlə təmasda isə qismən yenidən dəmirə çevrilir.