Bu gün Ağdaban faciəsindən 33 il ötür.
Baki-baku.az xatırladır ki, 1992-ci il aprel ayının 8-də Kəlbəcərin işğalından təqribən bir il əvvəl ermənilər bu rayonun Ağdaban kəndində soyqırımı törədib.
Həmin gecə ermənilər Ağdaban yalındakı gözətçi məntəqəsinə qalxıb, burada keşik çəkən 3 nəfəri qətlə yetirib, kəndin üst yanındakı bənd-bərələrə dolub səhər saat 6-da silahlardan atəş açmağa başlayıblar. Hər şeydən əvvəlcədən planlaşdırılıb. Qrup şəkilində evləri talan edənlər, mal-qaranı aparanlar, əsir götürənlər, qətlə yetirənlər bölünüblər.
Erməni separatçıları tərəfindən törədilmiş qırğın nəticəsində Kəlbəcər rayonunun 130 evdən ibarət Ağdaban kəndi tamamilə yandırılıb. Kəndin 779 nəfər dinc sakininə müxtəlif növ işgəncələr verilib, 67 nəfər isə amansızlıqla qətlə yetirilib. Bundan əlavə, 2 nəfər itkin düşüb, 12 nəfər isə ağır bədən xəsarətləri alıb.
Bu faciəyə ilk hüquqi-siyasi qiymət verən Azərbaycan xalqının Ümummilli Lideri Heydər Əliyev olub. O, Ağdabanda baş verənləri bəşəriyyətə qarşı törədilən ən böyük cinayət adlandırıb, bunu bütün insanlıq adına utanc kimi səciyyələndirib.
2020-ci ilin Vətən müharibəsində Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun işğal altındakı torpaqlarımızı azad edən zaman Ağdaban da vətənə qovuşdu. Bu gün Ağdaban Azərbaycanın ərazisindədir və çiçəklənmə dövrünü yaşayır.
