Bütün dünyada dairəvi tort üzərinə düzülən şamları üfürməklə doğum günü mərasimlərini keçirmək adət halını alıb. Bəs bu adət haradan gəlib?
Yunan mifologiyasında Artemida Ay, ismət və ov ilahəsidir. Qədim Yunanıstanda onun şərəfinə bayramlar keçirilir, bu zaman dairəvi piroqlar bişirilir və onların üzərində şamlar yandırılırdı. Belə bir qonaqlıq Ayı simvolizə edirdi. Yəni dairəvi forma bədirlənmiş ayı, şamlar isə Yerin peykinin parlaq işığını ifadə edirdi.
Bəs yunanları bunu haradan götürüb? Araşdırmalara görə, onlar bu ideyanı fironun tacqoyma mərasimi şərəfinə oxşar mərasimlər keçirən misirlilərdən götürüblər. Qədim Misirdə bu mərasim fironun allaha çevrilməsini simvolizə edirdi, ona görə də böyük təntənə ilə qeyd olunurdu.
Beləliklə, günümüzə qədər gələn doğum günlərində üzərində şamlar olan tort üfürmə ənənəsi məhz buradan gəlib.