Qədim İngiltərədə evdəki əlavə bir pəncərə belə sahibinə baha başa gələ bilərdi. Qəribə səslənsə də, bu ölkədə həqiqətən də pəncərə vergisi mövcud olub.
Baki-baku.az tarixdə tətbiq edilmiş ən qəribə vergilərdən birinə nəzər salır. XVII əsrdə İngiltərədə tətbiq olunmağa başlayan bu vergi 1696-cı ildə dövlət xəzinəsini doldurmaq məqsədilə qüvvəyə minib. Qaydaya əsasən, evdə pəncərələrin sayı nə qədər çox idisə, ödənilən vergi də bir o qədər yüksək olurdu. Hesab edilirdi ki, geniş malikanələrdə yaşayan varlı insanlar daha çox vergi ödəyəcəklər.
İngilislər bu vəziyyətdən çıxış yolu tapıblar. Vergi ödəmək əvəzinə, evlərinin pəncərələrini kərpiclə hörməyə başlayıblar. Nəticədə bütöv otaqlar günəş işığından və təmiz havadan məhrum qaldı. Pəncərələrin hörülməsi isə fəsadsız ötüşməyib. Həkimlər işıqsız və havasız otaqlarda yaşamağın sağlamlıq üçün təhlükəli olduğunu vurğulayıblar.
Bu qəribə vergi yalnız 1851-ci ildə, 155 ildən sonra ləğv olunub. İngiltərədə bəzi qədim binaların kərpiclə hörülmüş pəncərələri isə bu gün də həmin dövrü xatırladır.
Hacı Cavadov