Dəniz sahilinə çatan kimi sanki dünya bir anlıq dayanır. Daha dərindən nəfəs alır, problemlər haqqında daha az düşünür və qəribə bir rahatlıq hiss edirik. Araşdırmalar göstərir ki, bu, sadəcə hiss deyil, elmi baxımdan sübut olunmuş bir faktdır.

Baki-baku.az dənizin insan psixologiyasına və fiziki sağlamlığına olan müsbət təsirlərindən bəhs edir.
Alimlər bu fenomeni “Mavi sağlamlıq” (Blue Health) adlandırırlar. Araşdırmalar göstərir ki, su hövzələrinin yaxınlığında olmaq insanın stressdən daha tez çıxmasına, emosional vəziyyətinin yaxşılaşmasına və narahatlıq hissinin azalmasına kömək edir. Dalğaların səsi təbii meditasiya təsiri yaradır və beynin fasiləsiz düşüncə axınından qısa müddətə uzaqlaşmasına imkan verir.

Bununla yanaşı, daha bir maraqlı nəzəriyyə – biofiliya nəzəriyyəsi mövcuddur. Bu nəzəriyyəyə görə, insan qədim zamanlardan təbiətə, xüsusilə də suya qarşı xüsusi yaxınlıq hiss edir. Axı Yer üzündə həyat məhz okeanlarda yaranıb. Hətta göz yaşlarımızın və tərimizin tərkibi də müəyyən mənada dəniz suyunun tərkibini xatırladır.

Dəniz təkcə ruhumuz üçün deyil, bədənimiz üçün də faydalıdır. Sahilboyu gəzintilər və üzgüçülük bizi daha çox hərəkət etməyə sövq edir, əzələləri möhkəmləndirir və qan dövranını yaxşılaşdırır. Mineral maddələr və yodla zəngin dəniz havası tənəffüs sisteminə müsbət təsir göstərir, duzlu dəniz suyu isə dərini təmizləməyə kömək edir və bəzi dəri xəstəliklərinin əlamətlərini yüngülləşdirə bilər.

Tədqiqatçılar həmçinin qeyd edirlər ki, dəniz kənarında istirahət serotonin – xoşbəxtlik hormonu kimi tanınan maddənin ifrazını artırır. Bunun sayəsində insan özünü daha sakit hiss edir, diqqətini daha yaxşı cəmləyə bilir və gərgin işdən sonra enerjisini daha tez bərpa edir.

Bəlkə də elə buna görə bir çox insan dənizdə keçirdiyi bir neçə gündən sonra evə tamam başqa ovqatla qayıtdığını deyir. Bəzən orqanizmin ehtiyac duyduğu yeganə şey dalğaların səsi, təmiz dəniz küləyi və sonsuz üfüq mənzərəsidir.

Hacı Cavadov