“Xaç atası” kainatı genişlənir: “Paramount Pictures” məşhur mafiya dastanının dördüncü hissəsini hazırlayır. Yeni film 2027-ci ildə nəşr olunacaq “Konni” romanı əsasında ekranlaşdırılacaq.
Baki-baku.az xəbər verir ki, romanın hüquqları artıq “Random House” nəşriyyatı tərəfindən əldə edilib. Əsərin müəllifi amerikalı yazıçı Adriana Tricianidir. O, “Xaç atası” dünyasında roman qələmə alan ilk qadın yazıçı kimi tarixə düşüb.
Bu dəfə Korleone ailəsinin hekayəsi fərqli rakursdan təqdim olunacaq. Süjet don Vito Korleonenin yeganə qızı Konstansiya — Konni Korleonenin həyatına fokuslanır. Roman qadının əvvəlcədən onun üçün müəyyən edilmiş qaydalar içində öz yerini tapmaq uğrunda mübarizəsini əks etdirəcək.
Adriana Tricianinin sözlərinə görə, “Konni” qadının kimliyi, cəmiyyətdəki mövqeyi və ona münasibətlə bağlı sərhədləri aşmağa çalışmasını göstərir.
Xatırladaq ki, “Xaç atası” trilogiyasında Konni obrazını rejissor Frensis Ford Koppolanın bacısı Taliya Şayr canlandırıb.
