Müasir mərhələdə dayanıqlı inkişaf yalnız ekoloji məsələ kimi deyil, həm də iqtisadi sabitlik, sosial rifah və səmərəli idarəetmə ilə birbaşa əlaqəli strateji prioritet kimi dəyərləndirilir.

Baki-baku.az xəbər verir ki, bu fikirləri Aygün Əliyeva World Urban Forum 13 çərçivəsində keçirilən “Azərbaycanın İlk Milli Davamlılıq Standartının Hazırlanması: Davamlı Təcrübələr Standartı (SPS)” mövzusunda sessiyada çıxışı zamanı səsləndirib.

O qeyd edib ki, Birləşmiş Millətlər Təşkilatının Dayanıqlı İnkişaf Məqsədləri, xüsusilə 11-ci məqsəd – dayanıqlı şəhərlər və icmalar üzrə hədəf – göstərir ki, şəhər və regional siyasətlər ətraf mühitin davamlılığı prinsipləri ilə uzlaşdırılmadan uzunmüddətli inkişafın təmin olunması mümkün deyil. Onun sözlərinə görə, bu gün WUF13 çərçivəsində şəhər idarəetməsində inklüzivlik, çoxsəviyyəli koordinasiya, ictimai iştirak, dayanıqlılıq və “yaşıl şəhər” yanaşması əsas prioritetlər kimi daha da önə çıxır.