Mayın 19-da Ümumdünya Şəhərsalma Forumunun 13-cü Sessiyası (WUF13) çərçivəsində “BMT-Habitat-Qlobal-NDC 3.0: İqlim öhdəliklərini təmin etmək üçün şəhər qanunu və çoxsəviyyəli idarəetmə” mövzusunda tədbir keçirilib.
Baki-baku.az xəbər verir ki, BMT-nin Türkiyədəki rezident əlaqələndiricisi Babatunde Ahonsinin moderatorluğu ilə keçirilən tədbir qanunun, idarəetmənin və siyasətin milli iqlim ambisiyaları ilə yerli reallıqlar arasındakı boşluğu necə aradan qaldıra biləcəyini və şəhərləri iqlim fəaliyyətinin mərkəzinə necə qoya biləcəyini araşdırılıb.
Müzakirələrdə Pakistan İslam Respublikasının iqlim dəyişikliyi üzrə federal naziri Musadik Malik, BMT-nin Məskunlaşma Proqramının (UN-Habitat) Siyasət və Qanunvericilik Departamentinin rəhbəri Fiona McCluney, Meksikanın Çoxtərəfli İşlər və İnsan Hüquqları üzrə nazir müavini Enrique Javier Ochoa Martinez və digərləri çıxış ediblər.
Bildirilib ki, iqlim dəyişikliyi kontekstindən danışarkən, onun təsiri qlobal miqyasda hər kəsə bərabərdir. Lakin bu təsirlə mübarizə aparmaq potensialı fərqlidir. Həssas və qorunmasızlar bu təsirlə müvafiq resursları olanlarla müqayisədə tamamilə fərqli şəkildə mübarizə aparırlar. Bu həssaslıq kontekstində şəhərlər təsirin ön cəbhəsini təşkil edir. Miqrasiya baş verəndə bu, şəhərdən şəhərə olmur, kənd yerlərindən şəhərlərə doğru baş verir. Daşqınlar baş verəndə infrastrukturun dağılması şəhərlərdə yaşanır.
