Müxtəlif regionlarda yerləşən sənaye zonaları arasında yeni əlaqələrin qurulması və iqtisadi potensialın bərpası, əslində uzunmüddətli sülhün və əməkdaşlığın formalaşması üçün geniş imkanlar yaradır.
Baki-baku.az xəbər verir ki, bu fikirləri Azərbaycanın xarici işlər naziri Ceyhun Bayramov World Urban Forum 13 çərçivəsində keçirilən “Bağlantının mərkəzində şəhərlər: şəhər yenidənqurması və regional əməkdaşlıq” adlı tədbirdə çıxışı zamanı səsləndirib.
Nazir bildirib ki, yeni nəqliyyat dəhlizləri, dəmir yolu xətləri, avtomobil yolları, enerji infrastrukturu və rəqəmsal şəbəkələr Azərbaycanın sərhədlərindən kənara çıxaraq Asiya ilə Avropa arasında əlaqələrin möhkəmlənməsinə və daha geniş regional iqtisadi artım və əməkdaşlığın inkişafına töhfə verir.
Onun sözlərinə görə, Transxəzər Beynəlxalq Nəqliyyat Marşrutu (Orta Dəhliz) və Şimal–Cənub Nəqliyyat Dəhlizinin əsas təşviqedicilərindən biri kimi Azərbaycan postmünaqişə strategiyası çərçivəsində multimodal bağlantı gündəliyini davamlı şəkildə irəlilətməkdədir.
C.Bayramov qeyd edib ki, 2025-ci ilin avqustunda imzalanan Vaşinqton Bəyannaməsi “Beynəlxalq Sülh və Rifah naminə Tramp Marşrutu” təşəbbüsünün əsasını qoyub. Onun sözlərinə görə, bu təşəbbüs yalnız Azərbaycanın əsas ərazisi ilə Naxçıvan Muxtar Respublikası arasında maneəsiz multimodal əlaqəni təmin etməklə kifayətlənməyəcək, həm də dəmir yolu, avtomobil yolları, enerji kəmərləri, elektrik və fiber-optik xətlər vasitəsilə Asiya ilə Avropa arasında yeni strateji bağlantı xəttinin formalaşmasına şərait yaradacaq.
Nazir əlavə edib ki, Horadiz–Ağbənd dəmir yolu xətti və Türkiyədə inşa edilən Qars–İğdır–Dilucu dəmir yolu layihəsi Zəngəzur dəhlizinin tamamlanmasına töhfə verərək regional bağlantını gücləndirəcək və Asiya–Avropa əlaqələrini daha da möhkəmləndirəcək.
