Azərbaycan COP və WUF platformaları vasitəsilə gələcək üçün əhəmiyyətli bir irs formalaşdırır. COP və WUF çərçivəsində həyata keçirilən təşəbbüslər bir-biri ilə sıx əlaqəlidir və Azərbaycan şəhərsalma layihələrinin ekoloji təşəbbüslərlə uzlaşdırılmasına xüsusi diqqət ayırır.
Baki-baku.az xəbər verir ki, bu fikirləri Dövlət Şəhərsalma və Arxitektura Komitəsinin Aparat rəhbərinin müavini, WUF13-ün milli əlaqələndiricisinin müavini Gülşən Rzayeva Bakıda keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunan “Münaqişə və həssas şəraitdə şəhərsalma məsələlərində həllər vasitəsilə sülhə əsaslanan iqlim fəaliyyəti” mövzusunda tədbirdə səsləndirib.
O, Azərbaycanın postmüharibə mərhələsində həyata keçirdiyi genişmiqyaslı yenidənqurma və quruculuq işlərinə toxunaraq bildirib ki, ölkə postböhran və postmünaqişə şəraiti üçün yeni inkişaf yanaşması ortaya qoyur.
“Reallaşdırılan bu təşəbbüslər təkcə şəhərlərin və icmaların yenidən inşasına xidmət etmir, eyni zamanda regionda sülhün möhkəmləndirilməsinə də töhfə verir”, – deyə Gülşən Rzayeva vurğulayıb.
