Azərbaycan bəstəkarlıq məktəbinin parlaq nümayəndələrindən olan Elza İbrahimova 10 yanvar 1938-ci ildə Hacıqabul (o vaxtkı Qazıməmməd) şəhərində dünyaya gəlib. Uşaqlıq illərindən musiqiyə olan böyük sevgisi ailəsi tərəfindən vaxtında dəyərləndirilir və o, peşəkar musiqi təhsilinə yönləndirilir. Bakıda 8 saylı musiqi məktəbini bitirdikdən sonra A.Zeynallı adına orta ixtisas musiqi məktəbində, daha sonra isə Üzeyir Hacıbəyov adına Azərbaycan Dövlət Konservatoriyasında (indiki Bakı Musiqi Akademiyası) bəstəkarlıq üzrə ali təhsil alır.
Elza İbrahimovanın yaradıcılıq yolu klassik akademik ənənələrlə estrada ruhunun uğurlu sintezi kimi səciyyələnir. O, 1969-cu ildə ilk mahnısını — Məmməd Rahimin sözlərinə yazılmış “Yalan ha deyil” əsərini bəstələyir. Bu mahnının ilk ifaçısı böyük sənətkar Şövkət Ələkbərova olur və bununla da bəstəkarın mahnıları geniş auditoriyaya yol tapmağa başlayır.
Elza İbrahimova Azərbaycan estradasına tanqo ritmini gətirən ilk bəstəkarlardan biri kimi də musiqi tariximizdə xüsusi yer tutur. Rəfiq Zəkanın sözlərinə yazılmış “Qurban verərdim” mahnısı əvvəlcə sovet dövrünün bədii şuraları tərəfindən soyuq qarşılanır — “burjua ruhu” daşıdığı iddia edilir. Lakin zaman hər şeyi yerinə qoyur: bu əsər, eləcə də “Sən mənə lazımsan” (Əliağa Kürçaylı), “Bağçadan keçmisən” (Ə.Əlibəyli) kimi mahnılar bəstəkarın ən sevilən nümunələrinə çevrilir və bu gün də yaddaşlardan silinmir.
Onun yaradıcılığı yalnız estrada ilə məhdudlaşmır. Elza İbrahimova iri həcmli, ciddi akademik janrlarda da məhsuldar çalışıb. Fortepiano və orkestr üçün üçhissəli konsert, “Afət”, “Şeyx Şamil”, “Yanan laylalar” operaları, həmçinin Azərbaycanın neft sənayesinin 130 illiyinə həsr olunmuş himn onun zəngin yaradıcılıq palitrasının göstəricisidir. Bununla yanaşı, romanslar, sonatalar, kvartetlər də bəstələyib.
Xüsusi qeyd etmək lazımdır ki, Rəşid Behbudovun ifasında səslənən “Ey vətən” mahnısı təkcə Azərbaycanda deyil, dünyanın bir çox ölkələrində vətənimizi tərənnüm edən musiqi rəmzlərindən birinə çevrilib. Elza İbrahimova Azərbaycan şairlərinin yüzlərlə şeirinə, eləcə də rus dilində onlarla poetik nümunəyə musiqi bəstələyib.
Onun sənəti dövlət səviyyəsində də yüksək qiymətləndirilib. 1992-ci ildə Əməkdar incəsənət xadimi, 2008-ci ildə isə Azərbaycan Respublikasının Xalq artisti fəxri adına layiq görülüb.
Uzun sürən xəstəlikdən sonra Elza İbrahimova 11 fevral 2012-ci ildə 74 yaşında vəfat edib və İkinci Fəxri Xiyabanda dəfn olunub.
Xatirəsi musiqilərdə yaşayan bəstəkar
Elza İbrahimova bu gün fiziki olaraq aramızda olmasa da, onun melodiyaları yaşayır, sevilir, oxunur. Onun musiqisi — həm zərif qadın duyğularının, həm də cəsarətli yaradıcılıq axtarışlarının səsidir. Doğum günü ərəfəsində bu böyük bəstəkarı ehtiramla yad edir, Azərbaycan mədəniyyətinə bəxş etdiyi ölməz irsə görə minnətdarlıqla xatırlayırıq.
