“Azərbaycan Dövlət Su Ehtiyatları Agentliyi yanında Suların İstifadəsi və Mühafizəsinə Dövlət Nəzarəti Xidmətinin 1 saylı Bakı Regional Bölməsi tərəfindən bu ilin aprel ayından etibarən aparılan monitorinqlər zamanı aşkarlanan nöqsanların sayı əhəmiyyətli dərəcədə azalıb”.
Suların İstifadəsinə və Mühafizəsinə Dövlət Nəzarəti Xidmətindən Baki-baku.az-a verilən məlumata görə, bu sözləri Xidmətin 1 saylı Bakı Regional Bölməsinin rəisi Zaur Hüseynov bildirib.
Bölmə rəisi qeyd edib ki, Abşeron suvarma kanalında inzibati xəta yaratmayan 338 ünvanda su götürmə hallarına rast gəlinib. Aparılan araşdırmalar nəticəsində həmin halların 277-nin qanunsuz olduğu müəyyən edilib və qanunsuz qoşulmalar dərhal aradan qaldırılıb.
Qeyd edilib ki, Xidmətin Bakı Regional Bölməsi tərəfindən ümumilikdə 134 inzibati xəta haqqında protokol tərtib olunub. Onlardan 18-i hüquqi, 31-i vəzifəli, 85-i isə fiziki şəxslərə aiddir.
Bölmə rəisinin sözlərinə görə, Hövsan kanalının çirkləndirilməsi ilə bağlı 2 hüquqi və 5 vəzifəli şəxs barəsində inzibati protokol tərtib olunub və məhkəmə qərarı ilə cərimə tətbiq edilib. Göllərin doldurulması ilə bağlı 4, çirkləndirilməsi üzrə isə 25 inzibati protokol rəsmiləşdirilib.
Əlavə olaraq vurğulanıb ki, Xəzər dənizinə münasibətdə də qanun pozuntuları qeydə alınıb, ümumilikdə 15 protokol tərtib edilib. Bunlardan 5-i çirkləndirmə, 10-u isə sahil mühafizə zolağının zəbt edilməsi ilə bağlıdır.
