Elm uzun müddət insan bədəninin yalnız kimyəvi və elektrik proseslərindən ibarət olduğunu düşünürdü.

Baki-baku.az xəbər verir ki, amma Yaponiyada aparılan maraqlı təcrübələr bu təsəvvürü bir qədər dəyişdi. Alimlər sübut ediblər ki, insan bədəni çox zəif bioloji işıq, yəni “biofoton” adlanan enerji forması yayır.

Bu işıq o qədər zəifdir ki, insan gözü onu seçə bilmir. Lakin yüksək həssaslıqlı xüsusi kameralar vasitəsilə həmin parıltını qeydə almaq mümkün olub. Tədqiqatlar göstərir ki, bədənimizdəki maddələr mübadiləsi zamanı hüceyrələrdə gedən kimyəvi reaksiyalar çox az miqdarda işıq hissəcikləri – fotonlar yaradır. Bu, canlı orqanizmin öz enerji axınını əks etdirən təbii bir hadisədir.

Maraqlısı odur ki, bu işığın gücü gün ərzində dəyişir: səhər və günorta saatlarında bədən daha çox, gecə isə daha az işıq yayır. Alimlər bunu insanın bioloji saatı ilə əlaqələndirirlər. Yəni bədənimizin enerji fəaliyyəti günün ritminə uyğun şəkildə dəyişir.

Bu kəşf təkcə elmi maraq doğurmur, həm də tibbi baxımdan yeni imkanlar açır. Gələcəkdə bu cür bioloji işığın öyrənilməsi vasitəsilə hüceyrə səviyyəsində gedən prosesləri, stress və xəstəlik əlamətlərini vaxtında müəyyənləşdirmək mümkün ola bilər.