Adətən daşları cansız və hərəkətsiz hesab edirik. Onlar milyon illər boyu eyni formada qalır, dəyişməz görkəmləri ilə təbiətin səssiz şahidləri kimi tanınır. Ancaq Rumıniyada “trovant” adlanan daşlar bu düşüncəni tamamilə alt-üst edir.

Baki-baku.az xəbər verir ki, “trovant” daşlarının ən qeyri-adi xüsusiyyəti onların yağışdan sonra böyüməsidir. Yağış suları daşların səthinə hopduqda içindəki mineral duzlar kimyəvi reaksiyaya girir və daşın kütləsi böyüyür. İlk baxışda sadə görünən bu proses əslində elə maraqlı nəticələr doğurur ki, sanki daşlar canlı orqanizm kimi inkişaf edir.

Bu daşların digər qəribə xüsusiyyəti isə yavaş-yavaş hərəkət edə bilmələridir. Əlbəttə, onlar insan gözü ilə izləniləcək qədər sürətli hərəkət etmir, amma uzun illər ərzində yerlərinin dəyişdiyi müşahidə olunub. Bu səbəbdən də yerli əhali onlara “canlı daşlar” adını verib.

Alimlər “trovant”ların böyüməsini geoloji və kimyəvi proseslərlə izah etsələr də, insanların marağını ən çox onların “hərəkət etməsi” cəlb edir. Çünki bu hadisə çox zaman canlılara xas xüsusiyyət kimi qəbul olunur. Bu daşlar haqqında saysız-hesabsız miflər yaranıb. Bəziləri onları “yerin nəfəsi”, bəziləri isə qədim dövrlərin yadigarları hesab edir.

Rumıniyada “Trovant Muzeyi” də yaradılıb və bu daşlar xüsusi qoruma altına alınıb. Hər il minlərlə turist bu möcüzəni öz gözləri ilə görmək üçün həmin bölgəyə üz tutur.