Altı il əvvəl müşahidə edilən sirli kosmik dalğalanmaların arxasında gözlənilməz bir sirr ortaya çıxıb. Alimlər bu hadisənin, ehtimal ki, başqa bir kainata açılan müvəqqəti “kosmik portal” olduğunu açıqlayıblar.

Bakı-baku.az bu barədə “Futurism” portalına əsasən xəbər verir ki, GW190521 adlanan bu hadisə əvvəlcə iki nəhəng qara dəliyin toqquşması kimi qiymətləndirilsə də, Çin Elmlər Akademiyasından olan tədqiqatçılar hadisənin əslində daha qeyri-adi bir mənzərəni əks etdirdiyini düşünürlər.

Alimlərin fikrincə, bu dalğalanma, başqa bir kainatda baş verən qara dəlik toqquşmasının bizim kainatdakı əks-sədası ola bilər. Bu da iki kainat arasında qısa müddətli bir keçidin – “kosmik yolun” – yaranmasına səbəb olub. Mütəxəssislər həmin yolun müvəqqəti olduğunu bildirirlər, lakin onun nə zaman bağlanacağı hələlik məlum deyil.

Bu kəşf paralel kainatların mövcudluğu və onlarla əlaqə imkanları haqqında maraqlı suallar doğurur.