Yeni elmi araşdırmaya görə, solaxay idmançılar bəzi növlərdə rəqiblərinə nəzərəçarpacaq dərəcədə üstün gəlirlər.

Baki-baku.az bu barədə “Royal Society Open Science” (RSOS) jurnalında dərc olunan tədqiqata istinadən xəbər verir. Tədqiqata görə, qılıncoynatma, stolüstü tennis, tennis və badminton üzrə dünya reytinqindəki göstəricilər təhlil edilib.

Məlum olub ki, ümumilikdə idmançıların yalnız 10%-i solaxay olsa da, ən yaxşı oyunçular arasında onların payı xeyli yüksəkdir. Məsələn, aparıcı qılıncoynadanlar və stolüstü tennisçilər arasında solaxayların nisbəti sağaxaylara nisbətən təxminən iki dəfə çoxdur. Dünyanın ən yaxşı 50 stolüstü tennisçisindən 20%-dən çoxu məhz solaxaydır.

Mütəxəssislərin fikrincə, bunun səbəbi rəqiblərin əsasən sağaxaylarla qarşılaşmağa öyrəşməsi və solaxay oyunçuların fərqli oyun tərzinin onları gözlənilməz və çətin rəqibə çevirməsidir. Üstəlik, yarış səviyyəsi artdıqca bu üstünlük daha da güclənir.

Alimlər hesab edirlər ki, solaxayların reaksiya sürəti və qeyri-adi hücum bucağı onlara dinamik və təmaslı idmanlarda da əlavə üstünlük qazandırır.