Paytaxt yollarında hərəkət edən hər bir sürücü təkcə öz təhlükəsizliyinə deyil, həm də ictimai asayişin qorunmasına cavabdehdir.

Baki-baku.az-ın məlumatına görə, bu baxımdan operativ nəqliyyat vasitələrinin hərəkəti xüsusi əhəmiyyət kəsb edir.

Operativ nəqliyyat vasitələrinə əsasən təcili tibbi yardım, yanğınsöndürən, polis, fövqəladə hallar xidməti, eləcə də xüsusi dövlət əhəmiyyətli tapşırıqları icra edən avtomobillər daxildir. Bu avtomobillər sirena səsi və işıq siqnalı ilə hərəkət etdikdə digər sürücülər onlara dərhal yol verməlidirlər. Çünki saniyələrin itirilməsi insan həyatına, ictimai təhlükəsizliyə və ya mühüm dövlət əmlakının qorunmasına təsir göstərə bilər.

Qanunvericiliyə görə, operativ nəqliyyat vasitələrinə yol verməyən sürücülər inzibati məsuliyyət daşıyır. Belə hallarda cərimə tətbiq olunur və bəzən sürücünün sürücülük hüququnun məhdudlaşdırılması da mümkündür. Bu qaydanı pozmaq yalnız qanuni məsuliyyət doğurmur, həm də insani dəyərlərə ziddir.

Əslində, operativ nəqliyyat vasitəsinə yol vermək sadəcə qanun tələbi deyil, həm də sosial həmrəyliyin göstəricisidir. Çünki bu hərəkətlə hər birimiz başqasının həyatının xilasına və ya təhlükənin qarşısının alınmasına yardım etmiş oluruq.