Milli Məclisin Əmək və sosial siyasət komitəsinin iclasında deputat Vüqar Bayramov pensiya yaşına az qalmış şəxslərin işdən azad edilməsinin qarşısının alınması ilə bağlı təklif irəli sürüb.

Baki-baku.az-ın məlumatına görə, deputat bildirib ki, bu məsələ Əmək Məcəlləsinə təklif olunan dəyişikliklər çərçivəsində nəzərdən keçirilə bilər.

“Təklif edirəm ki, pensiya yaşına yaxınlaşan vətəndaşların əmək hüquqlarının qorunması üçün qanunvericiliyə dəyişiklik edilsin. Beləliklə, onların əmək bazarında qalması və işini davam etdirməsi mümkün olar. Bu yanaşma bir tərəfdən həmin vətəndaşların pensiya yaşına qədər hüquqlarının qorunmasına imkan verər, digər tərəfdən isə həm dövlət, həm də özəl sektorda işəgötürənlərin onları işdən azad etməsinin qarşısını alar”, – deyə Vüqar Bayramov əlavə edib.

Bu təklifin reallaşması bir çox müsbət məqamlardan xəbər verir. Pensiya yaşına yaxın insanlar uzun illər əmək bazarında çalışaraq təcrübə toplayıblar. Onların qəfil işdən çıxarılması ailə büdcəsinə və sosial sabitliyə ciddi zərbə vura bilər. Bu qadağa həmin risklərin qarşısını alacaq. İşçilərin pensiya yaşına qədər işdə qalması, onların gələcək pensiya məbləğini artırmaqla daha rahat həyat sürməsinə imkan yaradacaq.

Eyni zamanda yaşı pensiyaya yaxın olan əməkdaşların işdə qalması müəssisələr üçün də faydalıdır. Onların topladığı bilik və bacarıq gənc kadrların hazırlanmasına və təcrübə qazanmasına xidmət edəcək. Belə dəyişiklik işəgötürənlərə pensiya yaşına az qalmış şəxsləri işdən azad etməklə yeni işçi götürmək imkanını məhdudlaşdırsa da, eyni zamanda sosial ədaləti və məşğulluğun davamlılığını təmin edəcək.

Qeyd edək ki, işçilər üçün işini itirmək qorxusu böyük stress yaradır. Bu hüquqi təminat onların həm işinə, həm də şəxsi həyatına daha rahat yanaşmasına şərait yaradacaq.