Fəsillərin dəyişməsi uşaqların sağlamlığına birbaşa təsir göstərir.

Baki-baku.az-ın məlumatına görə, xüsusilə məktəbəqədər və məktəbyaşlı uşaqlar hava şəraitinə daha həssas olduqları üçün ilin müəyyən dövrlərində xəstələnmə halları artır.

Temperaturun qəfil dəyişməsi, virusların aktivləşməsi və qapalı məkanlarda insanların sıx toplaşması uşaqlar arasında yoluxucu xəstəliklərin sürətlə yayılmasına səbəb olur.

Uşaqların ən çox xəstələndiyi fəsil payız və qış aylarıdır. Bu dövrdə hava sərinləşir, immunitet zəifləyir və qrip, soyuqdəymə, bronxit, angina, hətta pnevmoniya kimi xəstəliklərin sayı artır. Məktəb mövsümünün başlaması ilə bir çox uşaq eyni məkanda uzun müddət vaxt keçirdiyi üçün viruslar daha tez yayılır.

Valideynlər nələrə diqqət etməlidir?

Uşaqların immunitetini gücləndirmək üçün vitaminlərlə zəngin meyvə-tərəvəzlər, süd məhsulları və proteinli qidalar rasionda olmalıdır. Hava şəraitinə uyğun geyindirmək vacibdir. Həddindən artıq qalın və ya nazik geyim uşaqların tez xəstələnməsinə səbəb ola bilər.

Uşaqlara tez-tez əllərini yumağı öyrətmək yoluxma riskini azaldır. Otaqların mütəmadi havalandırılması vacibdir. Qapalı, havasız məkanlar virusların yayılmasına şərait yaradır. Kifayət qədər yuxu alan uşaqların immun sistemi daha güclü olur.

Qeyd edək ki, xəstəlik əlamətləri başladığı andan vaxtında pediatra müraciət etmək fəsadların qarşısını alır.