Dünyanın sahəsinə görə ən böyük gölünün Xəzər olduğu çoxlarına, ələlxüsus da azərbaycanlılara məlumdur. Sahilində yaşadığımız, qışda burada gəzinti edib, yayda çimərlikdə vaxt keçirdiyimiz dənizin göl olduğunu bəzən unutsaq da, əslində Xəzər ən böyük göldür.
Hələ məktəb vaxtından dərsliklərdən öyrəndiyimiz kimi dünyada ən uzun çay Nil, hövzəsinin sahəsinə görə ən böyük çay Amazondur.
Bəs dünyada ən uzun göl hansıdır? Qəribə olsa da, heç bunu düşünməmişdim. Sən demə, ən uzun göl Yer kürəsində quraqlığın hökm sürdüyü və sahəsinin 30%-nin səhra olduğu Afrika qitəsində yerləşir. Daha dəqiq desəm, Şərqi Afrika sınma zonası boyunca uzanır və Büyük Rift Vadisi çökəkliyində, Kongo, Tanzaniya, Zambiya ve Burundi ölkələri ərazisindədir.
Tanqanika gölü Afrikanın ən dərin, dünyanın isə ən uzun gölüdür. Uzunluğu 673 km olan gölün mənbələrdə 12 milyon il öncə yarandığı göstərilir. Zəngin canlı aləmi var. Tanqanika gölündə Nil timsahları, şirin su xərçəngləri, su samurları, ciklidlər, pelikanlar, flaminqolar və çoxlu unikal canlılar yaşayır. Buradakı canlılar milyonlarla il ərzində təkamül yolu keçdiyindən ekosistem üçün elmi əhəmiyyətə malikdirlər. Adının Luvale dilindən gəldiyi və mənasının ulduzlar olduğu deyilir.
