Son illərdə ölkəmizdə, o cümlədən paytaxt Bakıda çox böyük quruculuq, bərpa və yaşıllaşdırma işləri görülür. Onlarla yeni park və meqaparklar salınıb və bərpa olunub. Bunun nəticəsi olaraq ölkəmizdə bir sıra mötəbər ekoloji tədbirlər də keçirilib.
Baki-baku.az xəbər verir ki, göz oxşayan yaşıllıqlar həm oksigen təmini, həm də insanların asudə vaxtlarının gözəl və səmərəli keçməsinə xidmət edir. Elə bu günlərdə Bakının Səbail rayonunda Rixard Zorge küçəsinin akademik Zərifə Əliyeva küçəsi ilə kəsişməsində keçmiş böyük avtomobil dayanacağının yerində açılan yeni parkı da nümunə gətirmək olar.
Lakin görülən bütün bu gözəl işlərlə bərabər, təəssüf doğuran hallar da müşahidə olunur. Belə ki, “8 Noyabr” prospektində piyada səkisində əkilən şam ağacları ümumiyyətlə götürəndə təqdirəlayiqdir. Amma səkinin daralan yerlərində əkilən ağaclar gediş-gəliş üçün ciddi narahatlıq yaradır.
Ümid edirik ki, tezliklə aidiyyəti qurumlar bununla bağlı ölçü götürəcək və insanların piyada səkisində rahat gediş-gəlişi təmin ediləcək.
