Günəş sistemindən kənarda yerləşən və “yeni dünyalar” adlandırılan ekzoplanetlərin sayı sürətlə artır. NASA-nın son məlumatına əsasən, artıq 6000-dən çox ekzoplanetin mövcudluğu rəsmi olaraq təsdiqlənib.

Baki-baku.az xəbər verir ki, bu barədə “Live Science” məlumat yayıb.

Qeyd edək ki, ilk ekzoplanet cəmi 1992-ci ildə aşkarlanmışdı. Yəni cəmi 30 il ərzində elm bu sahədə nəhəng irəliləyişə nail olub.

NASA-nın Kepler missiyası 2015-ci ilə qədər 1000 ekzoplanet kəşf etmişdi. 2016-cı ildə bu rəqəm 1500-ə yaxınlaşdı. 2022-ci ilin martında 5000 ekzoplanet rəsmiləşdirildi. İndi isə bu göstərici 6000-i keçib.

Yeni nəsil teleskoplar, xüsusilə James Webb Kosmik Teleskopu və digər müasir müşahidə texnologiyaları sayəsində bu rəqəmin yaxın illərdə daha da artacağı gözlənilir.

Alimlərin fikrincə, bu rəqəm Süd Yolunda mövcud ola biləcək 100 milyard ekzoplanetlə müqayisədə çox az görünsə də, insanlıq üçün böyük elmi nailiyyətdir. Çünki bu kəşflər həyatın başqa planetlərdə də mövcud ola biləcəyinə dair ümidləri artırır.