Gələcəyi parlaq olan gəlirli bir iş qurmaq şübhəsiz ki, hər bir sahibkarın xəyalıdır. Bu gün dünyada bir gənc internetdən əldə etdiyi gəlirlə yeni “Tesla” avtomobili ala bilir, yaxud 30 yaşına çatmadan gözəl bir mənzil sahibi olmağı bacarır.
İnternet, texnologiya və avtomatlaşdırma işimizi və iş görmək tərzimizi kökündən dəyişməyə başlayıb. Bir ay ərzində həftədə 40 saat çalışmaqla qazanılan pulu hazırda texnologiyalar sayəsində gündə 15 dəqiqə sərf etməklə də qazanmaq mümkündür. Mövcud işləri müəyyən dəyişikliklə həyata keçirib təqdim etməklə də yüksək gəlirlər əldə etmək olar. Bəs həmin işlər hansılardır?
Baki-baku.az 2025-ci ildə yüksək gəlir gətirə biləcək 5 biznes ideasını araşdırıb və uğurlu olacağını düşündüklərini sizlərlə bölüşür. Bu biznes idealarını bu ildən həyata keçirənlərin yaxın 10 il ərzində biznes sıralarında üst pillələrdə qərarlaşacağı düşünülür.
Kiçik və orta bizneslərə müştəri qazandıracaq şirkət
Hazırda dünyada, eləcə də Azərbaycanda fəaliyyət göstərən şirkətlərin böyük qismini kiçik və orta biznes (KOB) subyektləri təşkil edir. Əksər iri şirkətlər də ilk başlarda KOB kimi fəaliyyət göstərib, uğurlu strategiya sayəsində böyüyərək iri şirkətə çevrilirlər. Bu səbəbdən iqtisadiyyatda mühüm paya sahib olan KOB-lara müştəri qazandırmaq aktual məsələlərdən biridir. Ekspertlər düşünür ki, 2025-ci ildən 2030-cu ilə qədər onlayn satış KOB-lar üçün mühüm vasitəyə çevriləcək. Lakin KOB rəhbərlərinin internet üzərindən müştəri cəlbi ilə bağlı sahəni öyrənməyə və bu istiqamətdə fəaliyyət göstərməyə zamanları yoxdur. Ona görə də texnologiyanın sürətlə inkişaf etdiyi, internet üzərindən müştərilərin cəlb olunduğu bir zamanda bu idea ilə şirkət quranların 10 ildə böyük gəlir əldə edəcəyi şübhə doğurmur.
Onlayn təhsil platforması
COVID-19 pandemiyası dövründə daha da ön plana çıxan onlayn təhsil pandemiyadan sonra da gündəmdə qalmaqdadır. Hazırda təhsil univeristet və məktəblərlə yanaşı, kurslarda və ya fərdi şəkildə müəllimlərin evlərində də öyrədilir. Dövrün tələblərinin sürətlə dəyişdiyi, hər bir xidmətin olduğunuz məkana qədər çatdırıldığı bir zamanda onlayn təhsil platforması yaratmaq uğurlu iş ideaları sırasında yer alır. Belə ki, bu platforma sayəsində gənclər istədikləri müəllimi seçə və olduğu məkanda təhsil ala bilərlər. Bu, həmçinin müəllimlərin evinin bir otağının hər gün hazırlığa gələn şagirdlər və tələbələr tərəfindən zəbt edilməsinin də qarşısını alar.
Yeni nəsil elektron avadanlıqların təmiri
Gündəlik həyatımınız bir parçasına çevrilən elektron avadanlıqlara hər gün yeniləri əlavə olunur. Məsələn, son bir neçə ildə elektron süpürgələr artıq bir çox evlərdə var. Ancaq bu kimi texnologiyalar gözləmədiyimiz bir zamanda bazara çıxdıqları üçün hazırda belə məhsulların təmirində böyük boşluqlar var. Buna görə də elektron avadanlıqların təmiri ilə məşğul olacaq bir şirkət qurmaq ən çox gəlir gətirəcək iş ideaları sırasında ilk yerlərdə mövqe tutur.
Səyyar gözəllik salonu
Zaman keçdikcə insanların xidmətlərin ən üst səviyyədə təşkilinə qarşı tələbləri artır. Üstəlik bu tələblərin heç də hər biri zəruri xidmətləri əhatə etmir. Bu səbəbdən qorxmadan səyyar gözəllik salonu xidməti göstərə bilərsiniz. Xüsusilə xanımlar böyük tədbirlərə, xüsusi günlərə qatılarkən evdən çıxaraq hansısa bir gözəllik salonuna gedib-qayıtmağa məcbur olurlar. Bunun üçün bütün günün səfərbər edənlər də var. Bu səbəbdən səyyar gözəllik salonları onların ən böyük yardımına çevrilə bilər. Həmçinin salona getmək üçün məhdudiyyətləri olan yaşlı xanımlar var ki, onlar üçün bu xidmət göydəndüşmə sayılır.
Onlayn təhsil kitabxanası
Onlayn təhsil özü ilə bərabər yeni iş idealarını da gətirir. Bu idealardan biri də onlayn təhsil kitabxanasıdır. Yəqin ki, çoxumuz məktəb və ya universitetdə oxuyanda “müəllim, kitabım evdə qalıb” cümləsini işlətmişik və buna görə danlanmışıq. Onlayn təhsilin bir üstünlüyü də dayanmadan kitabınızın harada olduğunu soruşan müəllimlərdən qurtulmaqdır. Ancaq təhsil üçün kitab lazımdır. Onlayn təhsil kitabxanasının mövcudluğu dərs vəsaitlərinin rahat əldə olunması və fiziki olaraq daşınmaması üçün unikal fürsətdir. Eyni zamanda müəllimlərin kitab unudan tələbələrə və şagirdlərə qarşı tədbir görmək imkanını artırır. Aylıq və ya illik abunəlik formatında belə bir kitabxananın yaradılması gələcəkdə yaxşı gəlir gətirəcək işlərdəndir.
