Alimlər Vyetnamda aşkar edilən qədim insan qalıqlarının tarixdə bilinən ən erkən qətllərdən birinə işarə etdiyini bildirirlər.

Baki-baku.az “Science Alert”ə istinadən bildirir ki, təxminən 12 min il əvvəl 35 yaşlı bir kişi başqa bir insan tərəfindən öldürülüb. Onun sümükləri “Thung Binh 1” mağarasında tapılıb.

Qalıqların yanında kvarsdan hazırlanmış iti ucluq aşkarlanıb. Arxeoloqların fikrincə, həmin alət kişinin boyun nahiyəsinə dəyib, ağır yaralanmaya və infeksiyaya səbəb olub. Nəticədə o, bir neçə gün və ya həftə ərzində həyatını itirib.

Mütəxəssislər bu tapıntını həm bölgə, həm də dövr baxımından son dərəcə nadir və əhəmiyyətli hesab edirlər. Bu kəşf qədim insanların həyatında zorakılığın nə qədər erkən ortaya çıxdığını da göstərir.