Bu gün Zəngilan şəhərinin işğaldan azad edilməsinin altıncı ildönümüdür. 2020-ci il oktyabrın 20-də Azərbaycan Ordusu Vətən müharibəsində növbəti tarixi zəfərə imza ataraq Zəngilan şəhərini və rayonun bir sıra kəndlərini işğaldan azad etdi. Bu qələbə xalqımızın illərlə ürəyində yaşatdığı torpaq həsrətinin sona çatması yolunda mühüm mərhələlərdən biri oldu.
Baki-baku.az xatırladır ki, həmin gün Prezident, Silahlı Qüvvələrin Ali Baş Komandanı İlham Əliyev özünün “X” sosial şəbəkə hesabında paylaşım edərək xalqımıza müjdə verdi. Dövlət başçısı Zəngilan şəhəri ilə yanaşı, Füzuli, Cəbrayıl, Xocavənd və Zəngilan rayonlarının bir sıra kəndlərinin də azad olunduğunu bildirdi.
Prezidentin paylaşımında bu sözlər yer aldı:
“Rəşadətli Azərbaycan Ordusu tərəfindən Füzuli rayonunun Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı, Cəbrayıl rayonunun Safarşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli, Xocavənd rayonunun Ağcakənd, Mülküdərə, Daşbaşı, Günəşli, Çinarlı, Zəngilan rayonunun Havalı, Zərnəli, Məmmədbəyli, Həkəri, Şərifan, Muğanlı kəndləri və Zəngilan şəhəri işğaldan azad edilib. Eşq olsun Azərbaycan xalqına! Qarabağ Azərbaycandır!”
Bu xəbər həmin gün ölkənin hər yerində böyük sevinc və qürur hissi ilə qarşılandı. Zəngilanın azadlığı yalnız hərbi uğur deyildi. Bu, doğma yurdlarından didərgin düşmüş insanların qayıdış ümidinin güclənməsi, tarixi ədalətin bərpası və Azərbaycanın ərazi bütövlüyünün təmin olunması yolunda atılan mühüm addım idi.
Zəngilanın strateji mövqeyi də qələbənin əhəmiyyətini artırırdı. Azərbaycanın cənub-qərbində, Araz çayı boyunca yerləşən rayon ölkənin iqtisadi və nəqliyyat əlaqələri baxımından mühüm potensiala malikdir. Onun azad edilməsi bölgədə gələcək inkişaf, nəqliyyat-kommunikasiya əlaqələrinin genişləndirilməsi və yeni iqtisadi imkanların yaranması üçün əhəmiyyətli zəmin formalaşdırdı.
Zəngilanın taleyi həm də Qarabağ və Şərqi Zəngəzur torpaqlarının yaddaşında qalan uzun ayrılığın tarixidir. İllərlə doğma evlərinə qayıtmaq həsrəti ilə yaşayan insanların arzusu bu qələbə ilə gerçəyə çevrilmək yoluna qədəm qoydu. Bu gün həmin torpaqlarda aparılan bərpa və quruculuq işləri, doğma yurdlarına qayıdan sakinlərin həyatlarını yenidən qurması Zəngilanın gələcəyinə dair ümidləri daha da artırır.
Qeyd edək ki, Prezident İlham Əliyevin 31 iyul 2023-cü il tarixli Sərəncamına əsasən, hər il oktyabrın 20-si Zəngilan şəhəri günü kimi qeyd olunur.
Bu gün Zəngilanın azadlığı Azərbaycan xalqının yaddaşında qəhrəmanlıq, birlik və doğma torpağa bağlılığın rəmzi kimi yaşayır. Altı il əvvəl səslənən qələbə müjdəsi isə Zəfər tariximizin unudulmaz səhifələrindən biri olaraq qalır.
