Həyat çətinliklərlə doludur. İş yerində təzyiqlər, şəxsi həyatda qarşılaşılan problemlər, gözlənilməz itkilər və dəyişikliklər insanı həm fiziki, həm də psixoloji olaraq sarsıda bilər. Bəziləri bu çətinliklər qarşısında sınır, digərləri isə daha da güclənir. Onları bir-birindən fərqləndirən əsas amil isə mental gücdür.
Mental güc nədir?
Mental güc insanın emosional, zehni və psixoloji çevikliyidir. Bu, yalnız “güclü olmaq” anlamına gəlmir. Əsl mental güc duyğuları anlamaq, qəbul etmək və onlara nəzarət edə bilmək bacarığıdır. Bu güc, insanın çətin vəziyyətlərdə pozitiv qalmasını, qərar verməkdə tərəddüd etməməsini və yenidən ayağa qalxa bilməsini təmin edir.
Çətinliklər qarşısında sınmamaq üçün nə etməli?
1.Hisslərini inkar etmə – qəbul et
“Güclü olmaq” bəzən yanlış olaraq hissləri boğmaqla qarışdırılır. Əslində isə, ağlamaq, qorxmaq və ya narahat olmaq zəiflik deyil. Hissləri tanımaq və onlara ad vermək, onları idarə etmənin ilk addımıdır.
2.Fokusunu dəyiş – nəzarət edə bildiklərinə yönəl
Problemlərin hamısı sənin nəzarətində deyil. Əvəzində öz münasibətini, cavablarını və davranışlarını seçmək sənin əlindədir. Özünə sual ver:
“Bu vəziyyətdə mən nə edə bilərəm?”
3.Daxili dialoqa diqqət et
Özünlə necə danışırsan?
“Mən bacarmaram”, “Mən zəifəm”, “Hər şey pis olacaq” kimi fikirlər beynini zəhərləyir. Onları “Bu çətindir, amma mən öhdəsindən gələ bilərəm”, “İndi özümü pis hiss edirəm, amma bu da keçəcək” kimi fikirlərlə əvəz et.
4.Məqsədlərə parçalayaraq yaxınlaş
Böyük problemlər qarşısında insan özünü çarəsiz hiss edir. Bu zaman məqsədləri kiçik və real addımlara bölmək motivasiyanı artırır və yükü azaldır. Hər addım bir qələbədir.
5.Sağlam rutin qur
Mental güc bir gündə formalaşmır. Bu, davamlı qayğı və diqqət tələb edir:
Yuxu rejimini qoruyun
Fiziki aktiv olun
Sosial təmasdan çəkinməyin
Özünüzə zaman ayırın
6.Uğursuzluğa təcrübə kimi bax
Mental güclü insanlar uğursuzluqları son deyil, öyrənmə fürsəti kimi görür. “Nə üçün bu baş verdi?” yox, “Bu vəziyyətdən nə öyrənə bilərəm?” sualını vermək sizi böyüdür.
Sınmaq yox, çevrilmək
Mental güc daxildən gələn bir elastiklikdir. Bu güc sizi çətinliklərdən qorumaq üçün deyil, çətinliklər içində də böyüyə bilməyiniz üçün lazımdır. Unutmayın: sınmamaq hər zaman sərt qalmaq deyil. Bəzən sınmaq, ağlamaq, dayanmaq və sonra yenidən başlamaq mental gücün ən aydın göstəricisidir.
Əgər həyat sizi yıxıbsa, bu sizin zəif olduğunuz anlamına gəlmir. Yerdə qalmaq — seçimdir. Ayağa qalxmaq isə gücünüzün sübutudur.
Xanım Aydın
