Dünən Bakı şəhərinin Biləcəri qəsəbəsində sakinlərlə görüş keçirilib.
Baki-baku.az xəbər verir ki, görüşdə Bakı Şəhər İcra Hakimiyyətinin başçısı Eldar Əzizov və Binəqədi Rayon İcra Hakimiyyətinin başçısı Elxan Allahverdiyev iştirak ediblər.
Tədbirin açılış nitqini Eldar Əzizov edərək sakinləri salamlayıb. Daha sonra söz Binəqədi qəsəbə nümayəndəsinə verilib. Qəsəbə rəsmisi çıxışında Biləcəri sakinlərinin qarşılaşdıqları gündəlik problemləri qeyd edib və bu məsələlərin diqqətdə saxlanıldığını vurğulayıb.
Görüş zamanı sakinlər bir sıra vacib məsələləri səsləndiriblər. Onların sırasında asfalt örtüyünün yenilənməsi, su təchizatı sistemlərinin təmiri, evlərin sənədləşməsi, bəzi ərazilərdə su yığılması ilə bağlı çətinliklərin aradan qaldırılması, küçələrin işıqlandırılması, iş ilə təmin olunmaq və təhsil xərclərinə yardım kimi mövzular yer alıb.
Bakı Şəhər İcra Hakimiyyətinin başçısı Eldar Əzizov səsləndirilən problemləri diqqətlə dinləyərək, onların həlli üçün aidiyyəti qurumlara göstəriş verildiyini bildirib.
Görüşün sonunda vətəndaşlar bu cür açıq dialoqların davamlı olmasının vacibliyini vurğulayıblar.
