2-ci hissə
Haşımovun evi
Gənclər meydanında Qoşa qala qapısına yaxın olan bina. Milyonçu Hacibaba Haşımovun evi olub. Bir vaxtlar Siyasi Maarif Evi adlanırdı. Hazırda Konustutsiya məhkəməsi bu binada yerləşir.
Dənizçilər evi
Daha çox rus dilində “Morskoye sobraniye” kimi təqdim olunub. Xaqani küçəsi ilə Bülbül prospektinin kəsişdiyi tində, bağla üzbə-üz binanın birinci mərtəbəsində olub. Hazırda burada Bakı Dənizçilər Klubu yerləşir. Binaya giriş Bülbül prospektindən olub. Afişalarda Bəhriyyə klubu kimi də yazılıb.
Dənizçilər evi əvvəllər “Nəciblər klubu”nda və çox az müddətə müxtəlif binalarda yerləşib.
Nikitin qardaşları sirki
Opera teatrının fasad qapısı ilə Bülbül prospektinin arasında, həmin sırada olub. Yanandan sonra keçmiş 26-lar bağının (Mirzə Fətəli Axundzadə adına Mərkəzi Respublika Kitabxanasının həndəvərində) yanında taxta binada yerləşib.
Pelmel teatrı
“Pelmel” həftəbecər kimi qəbul olunub. Milyonçu Hacıbaba Haşımovun oğlu Yaponiyada xoşuna gələn kazino binasını Bakıda, indiki Azərbaycan Dövlət Rus Dram Teatrı binasının (Xaqani küçəsi) daş və taxta materialdan tikdirib. Burada kazino ilə yanaşı, müəyyən günlərdə konsertlər verilib, musiqili-əyləncəli proqramlar göstərilib, tamaşalar oynanılıb. “Pelmel” teatrı binasında əsasən rus və digər əcnəbi millətlərin teatr və musiqi həvəskarları, əcnəbi truppalar çıxış edib. Bu bina “Mikado” teatrı kimi də tanınıb.
Müəllif: İlham Rəhimli
