“Azərbaycan Respublikası ilə Özbəkistan Respublikası arasında media sahəsində əməkdaşlığın inkişafına dair Yol Xəritəsi” çərçivəsində Azərbaycanın media nümayəndələri üçün mediatur təşkil olunub.
“BakıBaku” AZƏRTAC-a istinadən xəbər verir ki, Azərbaycan mediasının nümayəndələri Daşkəndə səfərlərinin ilk günü Özbəkistan paytaxtının zəngin tarixini və müasir inkişafını əks etdirən tarixi məkanlarda və mədəni obyektlərdə olublar.
Əvvəlcə, qonaqlar 1966-cı ildə baş vermiş dağıdıcı Daşkənd zəlzələsi qurbanlarının xatirəsinə 1970-ci ildə ucaldılmış “İgidlik” memorial kompleksini ziyarət ediblər.
Mərkəzi Asiyanın ən qədim İslam abidələrindən biri olan “Minor” məscid kompleksi öz memarlıq üslubu və mənəvi ab-havası ilə azərbaycanlı jurnalistləri heyran edib. Qeyd olunub ki, bu kompleks dini mərkəz olmaqla yanaşı, həm də bəşəriyyətin mədəni sərvətidir.
Sonra jurnalistlər Daşkəndin ən böyük mədəniyyət və memarlıq abidələrindən biri olan Əbubəkr Qəffal əş-Şaşi mavzoleyində olublar. Bu abidə Özbəkistan paytaxtının qədim rayonunda yerləşən “Həzrəti İmam” memarlıq kompleksinə daxildir. Qonaqların diqqətinə çatdırılıb ki, Əbubəkr Qəffal əş-Şaşi müsəlman aləmində ilk imamlardan biri, “Quran”ın, hədislərin və İslam hüququnun bilicisi kimi tanınırdı.
Qonaqlar Özbəkistan paytaxtının xalq arasında “Daşkəndin Venesiyası” kimi tanınan ən məşhur məhəllələrindən birində də olublar. Onlara məlumat verilib ki, böyük Kalkavuz kanalı (onun adı Firdovsinin “Şahnamə” epik poemasının personajı fars hökmdarı Keykavusla bağlıdır) 48 daha kiçik qollara ayrılır.
Jurnalistlər, həmçinin Daşkəndin məşhur “Çorsu” bazarında yerli məhsulların müxtəlif çeşidləri və sənətkarlıq nümunələri ilə tanış olublar.
Media nümayəndələri Daşkəndin gecə həyatına da qərq olublar. Musiqili fəvvarə qonaqların xüsusi marağına səbəb olub. Ritmik musiqi ilə müşayiət olunan işıqların və suyun ahəngi onlarda unudulmaz təəssürat yaradıb. İşıqlı küçələrdə gəzintiyə çıxan qonaqlar binaların memarlıq üslubu, onların kontrastı, habelə qədim ənənələrin müasir həyatla vəhdətini müşahidə ediblər.
