Argentinanın Puerto Tirol şəhərində qeyri-adi və hələlik izah olunmayan bir hadisə baş verib – səmadan birbaşa fermaya naməlum obyekt düşüb.

Baki-baku.az xəbər verir ki, “Mirror” nəşrinin məlumatına görə, fermaya düşən obyektin təxminən 1,7 metr uzunluğu və 1,2 metr diametri olub. Onu daha da müəmmalı edən isə səthini örtən saçabənzər qəribə qara liflərdir.

İlkin ehtimallara görə, bu, adi meteorit deyil. Hadisə yerinə polis, xilasetmə xidməti və partlayıcı maddələr üzrə mütəxəssislər cəlb olunub. Obyektin təhlükəli material ehtiva etmədiyi açıqlansa da, əraziyə 30 metrlik təhlükəsizlik zonası tətbiq olunub.

Hazırda bu qəribə obyektin mənşəyi və təyinatı ilə bağlı araşdırmalar davam edir. Yerli sakinlər isə bu hadisəni “kosmosdan gələn xəbərdarlıq” kimi dəyərləndirirlər.

Elm adamları və səlahiyyətli qurumlar yaxın günlərdə obyektin təbiəti ilə bağlı ətraflı rəy verəcəklər. Səma isə bu dəfə öz sirrini hələ paylaşmayıb.