Uşaqlar hər bir dövlətin gələcəyidir və məhz buna görə də böyüməkdə olan nəslə qayğı Azərbaycanın dövlət siyasətində xüsusi yer tutur. Uzun illərdir ki, Azərbaycan Respublikasının Prezidenti İlham Əliyev, Birinci vitse-prezident Mehriban xanım Əliyeva və Heydər Əliyev Fondunun vitse-prezidenti Leyla Əliyeva uşaqların təhsili, sağlamlığı, sosial müdafiəsi və hərtərəfli inkişafı məsələlərinə böyük diqqət yetirirlər.
Azərbaycanda uşaqlara qayğı sistemli xarakter daşıyır və onların həyatının müxtəlif sahələrini əhatə edir. Müstəqillik illərində ölkədə məktəblərin, uşaq bağçalarının, tibb müəssisələrinin, idman komplekslərinin və yaradıcılıq mərkəzlərinin tikintisi və yenidən qurulması istiqamətində genişmiqyaslı dövlət proqramları həyata keçirilib. Uşaqların yaşadığı yer, sosial vəziyyəti və ya sağlamlıq durumu nəzərə alınmadan onlar üçün bərabər imkanların yaradılmasına xüsusi önəm verilir.
Prezident İlham Əliyev çıxışları zamanı dəfələrlə vurğulayıb ki, uşaqlara qoyulan investisiya dövlətin gələcəyinə qoyulan investisiyadır. Məhz buna görə də gənc nəslin təhsili və tərbiyəsi ölkənin sosial-iqtisadi siyasətində mühüm yer tutur. Azərbaycanda təhsil müəssisələrinin maddi-texniki bazası ardıcıl olaraq gücləndirilir, müasir təhsil standartları tətbiq edilir, uşaqların bacarıq və istedadlarının üzə çıxarılması üçün əlverişli şərait yaradılır.
Bu istiqamətdə Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondu mühüm rol oynayır. Fondun fəaliyyətinin əsas istiqamətlərindən biri uşaqların hüquq və mənafelərinin qorunması, onların təhsil, sağlamlıq və həyat şəraitinin yaxşılaşdırılmasıdır. Fondun fəaliyyəti dövründə uşaq evlərinə, internat məktəblərinə, tibb müəssisələrinə və reabilitasiya mərkəzlərinə dəstək məqsədilə onlarla sosial layihə həyata keçirilib.
Fond dövlətin və cəmiyyətin xüsusi qayğısına ehtiyacı olan uşaqlara da böyük diqqət göstərir. Uşaq evləri və internat məktəblərinin sakinləri, valideyn himayəsindən məhrum olmuş uşaqlar, aztəminatlı ailələrin övladları, eləcə də sağlamlıq imkanları məhdud uşaqlarla bağlı müxtəlif dəstək layihələri reallaşdırılır. Bu təşəbbüslərin bir çoxu yalnız uşaqların həyat şəraitinin yaxşılaşdırılmasına deyil, həm də onların cəmiyyətə tam inteqrasiyasına xidmət edir.
Mehriban xanım Əliyevanın fəaliyyətində mühüm istiqamətlərdən biri də səhiyyə sisteminin inkişafı və müalicəyə ehtiyacı olan uşaqlara yardım göstərilməsidir. Heydər Əliyev Fondunun dəstəyi ilə müxtəlif xəstəliklərlə mübarizə proqramları həyata keçirilir, mürəkkəb tibbi əməliyyatlar aparılır, uşaqlar üçün profilaktik müayinələr və sağlamlaşdırıcı tədbirlər təşkil olunur. Minlərlə ailə həyatlarının ən çətin anlarında Fondun dəstəyini hiss edib.
Mehriban xanım Əliyevanın fəaliyyətində valideyn himayəsindən məhrum olmuş uşaqlara qayğı xüsusi yer tutur. Heydər Əliyev Fondu mütəmadi olaraq kimsəsiz uşaqlar, şəhid övladları və müxtəlif xəstəliklərdən əziyyət çəkən uşaqlar üçün bayram tədbirləri, təhsil proqramları, mədəni layihələr və xeyriyyə aksiyaları təşkil edir. 2024-cü ilin avqust ayında Mehriban xanım Əliyeva və Leyla Əliyeva valideyn himayəsindən məhrum olmuş uşaqlar, eləcə də şəhid övladları üçün təşkil edilən tədbirdə iştirak ediblər. Görüş zamanı onlar uşaqlarla səmimi söhbət edib, onların yaradıcılıq nümunələri ilə tanış olub və bayram sevincini onlarla bölüşüblər.
Humanitar layihələrin həyata keçirilməsində Leyla Əliyevanın da mühüm rolu var. Onun fəaliyyəti uşaqlar və gənclərlə bağlı geniş sosial layihələri əhatə edir. Leyla Əliyeva xeyriyyə aksiyalarında, ekoloji və təhsil proqramlarında fəal iştirak edir, xüsusi qayğıya ehtiyacı olan uşaqlara və çətin həyat şəraitində yaşayan uşaqlara dəstək göstərən layihələrin təşəbbüskarı kimi çıxış edir.
Gənc nəslin mədəni və yaradıcı inkişafına da daim diqqət yetirilir. Heydər Əliyev Fondunun və Leyla Əliyevanın dəstəyi ilə festivallar, müsabiqələr, sərgilər, idman yarışları və maarifləndirici tədbirlər keçirilir. Bu layihələr uşaqlara öz bacarıqlarını üzə çıxarmağa və potensiallarını reallaşdırmağa imkan yaradır. İstedadlı uşaqların və gənclərin dəstəklənməsi bu fəaliyyətin əsas istiqamətlərindən birinə çevrilib.
Azərbaycan torpaqlarının işğaldan azad edilməsindən sonra uşaqların doğma yurdlarına qayıdışı üçün şərait yaradılması xüsusi əhəmiyyət kəsb edib. Qarabağ və Şərqi Zəngəzurda məktəblərin, uşaq bağçalarının, mədəniyyət və idman obyektlərinin bərpası azad olunmuş ərazilərin yenidən qurulması proqramının vacib hissəsidir. Dövlət doğma torpaqlarına qayıdan uşaqların müasir təhsil alması, hərtərəfli inkişaf etməsi və təhlükəsiz şəraitdə yaşaması üçün bütün imkanları yaratmağa çalışır.
Şəhid övladlarına və Vətən müharibəsi iştirakçılarının uşaqlarına göstərilən dəstək də xüsusi əhəmiyyət daşıyır. Dövlət və ictimai təşkilatlar bu uşaqlar üçün sosial yardım, təhsil dəstəyi və psixoloji reabilitasiya proqramları həyata keçirirlər. Onlar ölkə rəhbərliyinin və Heydər Əliyev Fondunun daim diqqət mərkəzindədirlər.
Uşaqlara qayğının vacib istiqamətlərindən biri də milli-mənəvi dəyərlərin qorunmasıdır. Təhsil və mədəniyyət layihələri vasitəsilə gənc nəslə Vətənə sevgi, xalqının tarixinə və mədəniyyətinə hörmət, cəmiyyət qarşısında məsuliyyət hissi aşılanır. Hərtərəfli inkişaf etmiş, sağlam düşüncəli və vətənpərvər şəxsiyyətin formalaşdırılması dövlət siyasətinin əsas məqsədlərindən biri hesab olunur.
Uşaqlara qayğı birdəfəlik tədbir və ya ayrıca fəaliyyət istiqaməti deyil. Bu, güclü, savadlı və sağlam nəslin yetişdirilməsinə yönəlmiş uzunmüddətli strategiyadır. Məhz buna görə də Prezident İlham Əliyevin, Birinci vitse-prezident Mehriban xanım Əliyevanın və Heydər Əliyev Fondunun vitse-prezidenti Leyla Əliyevanın bu sahədəki fəaliyyəti təhsil, səhiyyə, mədəniyyət, idman və sosial müdafiə kimi müxtəlif istiqamətləri əhatə edir.
Təhsil almaq, inkişaf etmək və öz bacarıqlarını reallaşdırmaq imkanı olan xoşbəxt uşaq uğurlu cəmiyyətin ən mühüm göstəricisidir. Hər bir uşaq üçün belə şəraitin yaradılması isə Azərbaycanda ardıcıl şəkildə həyata keçirilən əsas vəzifələrdən biri olaraq qalır.
Hacı Cavadov
