Avropada keçirilən “İlin Təbiət Fotoqrafı 2026” müsabiqəsinin qalibləri açıqlanıb. Yarışmaya 15 müxtəlif ölkədən ümumilikdə 9 minə yaxın foto təqdim olunub.

Baki-baku.az xəbər verir ki, nəticələr GDT təşkilatının rəsmi internet səhifəsində yayımlanıb.

Bu il müsabiqənin əsas mükafatına 20 yaşlı fotoqraf Luka Lorents layiq görülüb. Onun çəkdiyi Alp dovşanı fotosu heyvanın təbii mühitdə necə ustalıqla gizləndiyini aydın şəkildə göstərir. Teleobyektiv vasitəsilə yaxın məsafədən çəkilən görüntüdə istifadə olunan texnika dovşanın kamuflyaj qabiliyyətini xüsusi vurğulayır. Kadrdakı yumşaq və bir qədər bulanıq xətlər isə sərt dağ relyefində hərəkət edən qar dənələrinin dinamikasını əks etdirir.

Qeyd edək ki, Alp dovşanları dağ şəraitinə yüksək uyğunlaşma qabiliyyəti ilə seçilir. Onlar fəsillərə uyğun olaraq tük rənglərini dəyişir: yayda qəhvəyi, qışda isə ağ rəngə bürünərək ətraf mühitlə demək olar ki, tam uyğunlaşırlar.

Bundan əlavə, GDT təşkilatı müsabiqədə iştirak edən digər fotoqrafların işlərini də ictimaiyyətlə bölüşüb.