Bakının Xətai rayonunda, Neapol dairəsinin yaxınlığında yerləşən Neapol küçəsində yaranmış vəziyyət sakinlərin haqlı narazılığına səbəb olub.
Baki-baku.az xəbər verir ki, həmin ərazidə velosipedlərin piyada səkisi üzərində saxlanılması adi hala çevrilib və bu, vətəndaşların sərbəst hərəkətini ciddi şəkildə məhdudlaşdırır.
Sakinlərin sözlərinə görə, xüsusilə piyada keçidinin ətrafında velosipedlərin düzülməsi gediş-gəlişi daha da çətinləşdirir.
Məsələ təkcə rahatlıqla bağlı deyil, eyni zamanda şəhər mədəniyyəti və ictimai məkanlardan düzgün istifadə məsələsini də gündəmə gətirir. Piyada səkiləri insanların təhlükəsiz hərəkəti üçün nəzərdə tutulsa da, nəzarətsiz şəkildə saxlanılan velosipedlər bu funksiyanı faktiki olaraq sıradan çıxarır.
Sakinlər bildirirlər ki, dəfələrlə bu problemə diqqət çəksələr də, hələlik konkret tədbir görülməyib. Onlar aidiyyəti qurumlardan Neapol küçəsində velosipedlər üçün ayrıca dayanacaqların yaradılmasını, piyada səkilərinin isə tam şəkildə piyadaların istifadəsinə qaytarılmasını xahiş edirlər.