Bakının Səbail rayonu ərazisində yaşıllıq ərazinin məhv edilməsi ilə bağlı fakt aşkarlanıb. Belə ki, Niyazi küçəsi 5 ünvanında yerləşən yaşıllıq sahə sahibkar tərəfindən dağıdılıb, əvəzinə daş örtük döşənib.

Baki-baku.az xəbər verir ki, məsələ ilə bağlı Bakı Şəhər İcra Hakimiyyətinin kommunal strukturları dərhal əraziyə baxış keçirib və qanunsuz müdaxilə aradan qaldırılıb. Görülən tədbirlər çərçivəsində məhv edilən yaşıllıq sahəsi bərpa olunub, əraziyə yeni ağaclar əkilib, torpağın münbitliyinin artırılması məqsədilə aqrotexniki qulluq işləri həyata keçirilib.

Qeyd edək ki, torpaq qatına qazon örtüyünün döşənməsi də nəzərdə tutulub. Bu tədbirlər ərazinin əvvəlki ekoloji vəziyyətinin bərpasına, həmçinin şəhər mühitində yaşıllıq balansının qorunmasına xidmət edir.

Bakı Şəhər İcra Hakimiyyəti bir daha bildirir ki, paytaxt ərazisində yaşıllıqların qanunsuz şəkildə məhv edilməsinə qarşı mütəmadi nəzarət həyata keçirilir və bu kimi hallara yol verən şəxslərlə bağlı qanunvericiliyə uyğun tədbirlər görülür.

Şəhərin ekoloji mühitinin qorunması və yaşıllıq sahələrinin artırılması istiqamətində işlər davamlı xarakter daşıyır.