Hər gün biz mütləq şəkildə su ilə təmasda oluruq – onu içirik, yemək bişiririk, qab yuyuruq və s. Amma bu maraqlı və adi maye haqqında nə qədər çox şey bilirik?
Baki-baku.az sizə su haqqında bir neçə maraqlı faktı təqdim edir:

Təmiz su dielektrikdir. O, yalnız qatışıqların hesabına elektrik cərəyanını keçirir.

İnsan orqanizmdəki suyun cəmi 12 %-ni itirdikdə həlak olur. 10 %-ni itirdikdə isə halüsinasiyalar yaranır.

Yer üzündəki bütün su ehtiyatlarının cəmi 1,1 %-i içməyə yararlıdır. Şirin suyun əsas hissəsi buzlaqlarda toplanıb.

Su işığı udur və səpir. Məhz buna görə okean bizə mavi görünür.

İsti su soyuqdan daha tez soyuyur və donur. Bu hadisə Mpemba effekti adlanır.

Alimlər suyun yalnız üç halını (bərk, maye və qaz) deyil, 20-dən çox halını ayırırlar. Müəyyən şəraitdə bu maddə şüşəyəbənzər, yüksək özlülüklü, axıcı vəziyyətlər ala bilər.

İnsan tərəfindən istifadə edilən bütün suyun 70 %-dən çoxu kənd təsərrüfatına sərf olunur. 22 %-i isə sənaye sahəsində işlədilir.

Təbiətdə tərkibcə tam təmiz H₂O şəklində su mövcud deyil. O, həmişə duzlar və digər maddələr ehtiva edir.

Ən bahalı içməli su ABŞ-da 1 litri 90 dollara satılır. Deyilənə görə, bəzəkli qablaşdırmada təqdim olunan bu su ideal turşuluq səviyyəsinə malikdir.

Su – təbiətdə eyni anda üç aqreqat halında rast gəlinə bilən yeganə maddədir. Hər kəs onu bərk, maye və qaz halında görüb.

ÜST-nin məlumatına görə, bütün məlum xəstəliklərin 80 %-ə qədəri keyfiyyətsiz suyun istifadəsi nəticəsində yarana bilər. XIX əsrdə buna bənzər nəticəyə Lui Paster də gəlmişdi.

İnsan yaşlandıqca, sözün əsl mənasında, “büzülür”. Embrion 94 % mayedən ibarətdir, uşaqda bu göstərici 80 %-dir, yaşlı insanda isə təxminən 60 %.

İmkanlı ölkələrdə bir nəfər gündə 100 litrdən çox su sərf edir. Orta əsrlərdə Avropalı bir insan gündə cəmi 5 litr su ilə kifayətlənirdi.

Bəzi tədqiqatçılar iddia edirlər ki, su yaddaşa malikdir. Hətta bütün qatışıqlardan təmizləndikdən sonra belə, o, “keçmişini xatırlayır”. Bu xüsusiyyət homeopatik vasitələrin az konsentrasiyada da təsirli olmasını izah etmək üçün istifadə olunur. Lakin rəsmi elm hələ bu qəribə xüsusiyyəti təsdiqləməyib.

Orqanizmdə maye çatışmazlığı çox vaxt aclıq hissi ilə qarışdırılır. Əgər doyduğunuzu hiss etmirsinizsə, sonuncu dəfə sadə su içdiyinizi xatırlayın.