Evdə istifadə olunan təmizləyici vasitələrdə xlor və fosfat kimi maddələrin olması sağlamlıq üçün təhlükə yarada bilər.

Baki-baku.az-ın məlumatına görə, xlor buxarları nəfəs yollarına zərər verə, selikli qişalarda qıcıqlanmaya səbəb ola bilər.

Fosfatlar və uçucu üzvi birləşmələr isə ürək, böyrək və dəri sağlamlığına mənfi təsir göstərə bilər.

Mütəxəssislər ev təmizliyində daha təhlükəsiz alternativlər seçməyi tövsiyə edirlər. Xüsusilə bitki mənşəli və bioçürüyən komponentlərdən ibarət məhsullar üstünlük təşkil etməlidir. Təmizləyici vasitələrin pH səviyyəsinə diqqət yetirmək də vacibdir, çünki çox turşu və ya çox qələvi tərkiblər həm ev əşyalarına, həm də insan sağlamlığına zərər verə bilər.

Eyni zamanda universal bir təmizləyici vasitənin olmadığı vurğulanır. Məsələn, turşulu və qələvi tərkibli məhsullar bir-birinin təsirini neytrallaşdırır, buna görə də hər bir səth və çirk növü üçün uyğun məhsul seçmək lazımdır.

Qeyd edək ki, bəzi maddələri, xüsusilə xlor və güclü kimyəvi tərkibləri, heç bir halda tualetə və ya kanalizasiya sisteminə tökmək olmaz, çünki bu həm sağlamlıq, həm də ekosistem üçün təhlükəli ola bilər.